Бош вазир Ўзбекистоннинг ўсиш нуқталари ҳисобланадиган ИТ-технологиялар, кон-металлургия ва нефть-газ соҳалари билан шуғулланади. Бу ҳақда Президент Шавкат Мирзиёев 7 май куни бўлиб ўтган видеоселектор йиғилишида маълум қилган, дея хабар бермоқда «Дарё» манбаси.
«Кўп вазифалар Бош вазир ўринбосарлари зиммасига ўтади. Бош вазир мамлакатнинг ўсишини таъминлайдиган йўналишлар билан шуғулланади, чет элларга боради. Биз жуда катта маррани оляпмиз, олдимизга камида 10-15 йилга мўлжалланган режаларни қўйдик. Бу эса бошқарув тизимида туб ўзгаришлар амалга оширишни талаб этмоқда», — дея таъкидлаган давлат раҳбари.
Шунингдек, Шавкат Мирзиёев «вазирларнинг ярмисини ишидан қониқмаётгани, келгуси ҳафтада кенгайтирилган йиғилиш ўтказилиши ва унда ҳокимлар эмас, вазирларнинг ҳисоботлари тингланиши ҳамда шунга қараб хулоса чиқарилиши»ни билдирган.
«Пандемия дунёқарашимни ўзгартирди, бошқаларнинг ҳам дунёқараши ўзгариши керак. Энди эскича услуб билан ишлаб бўлмайди. Вазирларнинг 30 фоиз вақти Тошкентда, 70 фоизи эса вилоятларда ўтиши керак. Шунда халқни ташвишлантирётган муаммоларни ҳис қилади, оддий одамлар билан ишлашни ўрганади», — деди Шавкат Мирзиёев.
Изоҳ (0)