Бухоро вилоятида 32 нафар, Хоразм вилоятида эса 1 нафар коронавирус инфекциясига чалинган бемор бутунлай соғайди ва 8 май куни реабилитацияга кузатилди. Ўзбекистон бўйича коронавирус инфекциясидан соғайган беморларнинг умумий сони 1721 кишига етди. Бу ҳақда Соғлиқни сақлаш вазирлиги хабар берди.
Бухорода шифо топганларнинг 21 нафари Россиядан чартер рейс билан олиб келинган, яна 1 нафари эса Қирғизистондан Бухорога келган ва карантинга олинган. Коронавирус инфекцияси тасдиқлангач, улар шифохонага жойлаштирилган. Қолган 10 нафар бемор эса коронавирусга чалинганлар билан мулоқотда бўлиб, касалликни юқтириб олган.
Тузалганларнинг 10 нафари Бухородан, 6 нафари Қашқадарёдан, шунингдек, Наманган ва Тошкент вилоятларидан 4 нафардан, Фарғонадан 2 нафар, Тошкент шаҳри, Қорақалпоғистон Республикаси, Жиззах, Сирдарё ва Сурхондарё вилоятларидан 1 нафардан фуқаро тузалган. Бундан ташқари, тузалганлар орасида 1 нафар Қирғизистон фуқароси ҳам бор.
Уларнинг 22 нафари эркак, 10 нафари аёл бўлиб, энг каттаси 78 ёшли онахон, энг кичиги эса 16 ёшда. Бухоро вилоятида шу пайтга қадар коронавирус инфекциясидан соғайган беморлар сони 404 нафарга етди.
Хоразмда тузалган 1 нафар эркак бемор 49 ёшда бўлиб, у Фарғона вилоятидан. У Қозоғистондан келган ва карантинга олинган. Коронавирус инфекцияси тасдиқлангач, мазкур бемор шифохонага жойлаштирилган. Эндиликда Хоразм вилоятда COVID-19 касаллигидан соғайганлар сони 168 нафарга етди.
Ўзбекистонда 8 май соат 10:00 ҳолатига кўра коронавирусга чалинганлар сони 2 314 нафарга етди. Ўзбекистонда коронавирус инфекцияси билан касалланиш илк бор қайд этилган 15 мартдан буён 10 нафар бемор эса вафот этган.
Касалланиш ҳолатлари сони нисбатан камайиб, эпидемиологик вазият барқарорлашиб бораётгани муносабати билан, Ўзбекистон ҳукумати карантин чораларини юмшатишга қарор қилган, мамлакат «қизил», «сариқ» ва «яшил» ҳудудларга ажратилган.
Изоҳ (0)