Грузияда 11 майдан бошлаб коронавирус пандемияси сабаб ёпилган барча турдаги ишлаб чиқариш корхоналари қайта иш бошлайди. Бу ҳақда мамлакат бош вазири Георгий Гахарияга таяниб, «РИА Новости» хабар берди.
Таъкидланишича, Грузияда фавқулодда ҳолат режими 22 майгача, шунингдек, комендантлик соати кечки 21:00 дан эрталабки 06:00 га қадар амалда бўлади.
«11 майдан барча турдаги ишлаб чиқаришлар очилади. Бунга қадар гап фақат қурилиш материаллари ишлаб чиқарувчилар ҳақида кетган бўлса, ҳозир барчаси қайта иш бошлайди. Шунингдек, кўчага чиқиш йўли бор барча дўконлар ҳам очилади, бу кийим-кечак дўконлари ва савдо марказларига тааллуқли эмас», — дейди бош вазир.
Эслатиб ўтамиз, Грузияда 17 апрелдан бошлаб коронавирус пандемияси тарқалишининг олдини олиш мақсадида, енгил автомобиллар ҳаракати тўлиқ тақиқланган эди. Шунингдек, мамлакатда31 мартдан бошлаб фавқулодда ҳолат якунлангунигача спиртли ичимликлар савдоси тўхтатилган ва мазкур санадан эътиборан Грузияда комендантлик соати ҳам жорий қилинган.
Изоҳ (0)