Польшада 10 май куни ўтказилиши режалаштирилган президентлик сайловлари бекор қилинди. Бу ҳақда мамлакатдаги ҳукумрон партия — «Қонун ва адолат» етакчиси Ярослав Качиньский ҳамда унинг коалиция бўйича ҳамкори, «Келишув» партияси етакчиси Ярослав Говинга таяниб, Польша матбуот агентлиги хабар берди.
«Сейм (парламент) спикери имкони борича яқин вақт ичида янги президентлик сайловлари ҳақида эълон қилади», — дейилади баёнотда. Баёнот муаллифларининг таъкидлашича, бу каби қарор «мухолифат томонидан бу йилги президентлик сайловларини конституцияда белгиланган муддатда ўтказиш имконини берувчи барча конструктив таклифларни қабул қилишдан бош тортгани муносабати билан» қабул қилинган.
Качиньский ва Говиннинг сўзларига кўра, янги сайловларни сиртдан — почта орқали ўтказишга қарор қилинган.
Аввалроқ Польша парламентининг қуйи палатаси «Ҳуқуқ ва адолат» партиясининг президентлик сайловларида овоз бериш жараёнларини масофадан туриб ўтказиш тўғрисидаги қонун таклифини қабул қилганди. 5 май куни юқори палата (сенат) ушбу қонунни қабул қилмаган. Бироқ сейм овозлар сони бўйича сенатнинг ветосини енгиши мумкин.
Эслатиб ўтамиз, Польшанинг амалдаги президенти Анжей Дуда 2015 йилги сайловларда 51,55 фоиз овоз тўплаб ғолиб чиққан эди.
Изоҳ (0)