2019 йилда АҚШ томонидан Ироқ, Сурия, Афғонистон ва Сомалида ўтказилган ҳарбий операциялар оқибатида 132 нафар тинч аҳоли ҳалок бўлган ва яна 91 киши жароҳат олган. Бу ҳақда Америка Мудофаа вазирлигининг ҳисоботида сўз боради.
Пентагон маълумотларига кўра, Ироқ ва Сурияда ИШИД террорчилик ҳаракатига қарши ўтказилган операциялар вақтида 22 киши ҳалок бўлган ва 13 киши жароҳат олган. Афғонистонда 108 нафар тинч аҳоли ҳалок бўлган, 75 киши жароҳат олган. Сомалида эса — 2 киши ўлдирилган ва 3 киши яраланган.
«Қуролли кучларимиз ушбу можароларда тинч аҳолига зарар етказмаслик учун мисли кўрилмаган чораларни кўрган бўлса-да, баъзан АҚШ томонидан ўтказилган ҳарбий амалиётлар бехосдан бегуноҳ фуқароларнинг жароҳатланиши ва ўлимига олиб келишини тан оламиз», — дейилади Пентагон ҳисоботида.
6 май куни АҚШ президенти Дональд Трамп Конгресснинг мамлакат қуролли кучларини Эронга қарши ишлатиш борасида президент ваколатини чекловчи резолюциясига вето қўйган эди. Америка етакчисининг сўзларига кўра, ушбу резолюция «АҚШ ва унинг иттифоқдошлари ҳамда ҳамкорларини ҳимоя қилиш» имкониятини чеклаши мумкин. Трампнинг маълум қилишича, Конституцияга кўра президентда жавоб ҳаракатлар борасида тезда қарор қабул қилиши учун рақибларнинг қадамларини олдиндан кўра билиш имконияти бўлиши керак.
Аввалроқ АҚШ Сурияда араблардан иборат махсус бўлинмаларни туза бошлагани ҳақида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)