Бухорода табиий офат оқибатида жиддий зарар етган 200 дан ортиқ кўп қаватли уйларни тиклаш ишлари давом этмоқда

27 апрель кечаси Бухоро вилоятида, айниқса, Олот ва Қоракўл туманларида кузатилган ёмғир аралаш кучли шамол оқибатида вилоят бўйича 38 мингдан зиёд аҳоли хонадонлари, 847 та ижтимоий соҳа объектларига, экин майдонларига зарар етган, юз берган табиий офат оқибатларини бартараф этиш ишларига давлат бюджетидан 100 миллиард сўм ажратилганди.

Уй-жой коммунал хизмат кўрсатиш вазирлиги матбуот хизматининг хабар беришича, Бухоро вилоятида юз берган табиий офат оқибатларини бартараф этиш, ҳаётий муҳим объектлар ва тизимларни, жумладан, уй-жой коммунал хизмат кўрсатиш соҳаси объектларини ишчанлик ҳолатига келтириш бўйича ишлар жадал олиб борилмоқда. Кучли шамол оқибатида зарар етказилган кўп квартирали уй-жойларни таъмирлаш, уйларга туташ ҳудудлардаги объектларни қайта тиклаш ишлари ҳам амалга оширилмоқда.

Бунинг учун Бухоро вилоят уй-жой коммунал хизмат кўрсатиш бошқармасида тезкор штаб ташкил этилиб, биринчи навбатда етказилган зарар ва йўқотишлар миқдорини аниқлаш ва баҳолаш ишлари йўлга қўйилган. Тезкор штаб томонидан ташкил этилган ўрганишлар жараёнида вилоятдаги мавжуд 1 881 та кўп квартирали уй-жойларнинг 204 тасига жиддий зарар етказилгани аниқланган. Жумладан, табиий офатдан энг кўп миқдорда зарарланган Олот туманидаги «Халқобод» МФЙ ҳудудида жойлашган 26 та кўп квартирали уйларнинг 25 таси, Қоракўл туманидаги 29 та кўп квартирали уйларнинг 27 тасида том қисми зарарлангани қайд этилган.

«Табиий офат электр энергияси таъминоти, алоқа ва табиий газ етказиб бериш тизимларини ишдан чиқариб, сув таъминоти иншоотлари ва қувурларига ҳам сезиларли даражада шикаст етказгани маълум бўлгач, ўша куннинг ўзидаёқ захира куч-воситалар жалб қилиниб, Олот ва Қоракўл туманларининг барча аҳоли яшаш масканларига ташима сув етказиб бериш йўлга қўйилган. Орадан икки кун ўтиб эса тезкор таъмирлаш-тиклаш гуруҳлари томонидан авария ҳолатлари бартараф этилиб, аҳолининг ичимлик сув таъминоти қайта тикланган.

Ана шу қисқа фурсатда Уй-жой коммунал хизмат кўрсатиш бошқармаси ташаббускорлигидаги мутасадди ташкилотлар ҳамкорлигида Олот ва Қоракўл туманларидаги жами 52 та кўп квартирали уйларнинг том қисмини тезкорлик билан тиклаш мақсадида 13 та пудрат ташкилотлари жалб қилиниб, айни кунда барча уйларда таъмирлаш-тиклаш ишлари олиб борилмоқда. Шундан 2 та уйнинг том қисми тўлиқ тикланиб, 15 та кўп квартирали уйларнинг профнастилгача бажарилиши лозим бўлган ишлари ҳам якунланди» — дейилади вазирлик хабарида.

Шунингдек, уй-жой коммунал хизмат кўрсатиш бошқармасининг туманлардаги бўлимлари саъй-ҳаракати билан пудратчи ташкилотлар жалб қилиниб, Бухоро шаҳридаги 8 та, Когон шаҳридаги 3 та, Пешку тумани марказидаги 4 та, Шофиркон шаҳарчасидаги 3 та ва Жондор туман марказидаги 1 та кўп квартирали уйларнинг том қисмлари тўлиқ тиклангани таъкидланган.

Аввалроқ вилоятда 70 фоиз ижтимоий объектлар томи ёпилгани, 5 минг километр электр тармоқлари, 1100 та трансформатор таъмирланиб, 286 минг аҳолининг электр таъминоти тиклангани хабар берилган эди.