Хитойда ўтган бир сутка ичида коронавирус билан касалланиш бўйича 2 та ва касаллик белгисиз ўтаётган 20 та ҳолат аниқланди, 58 нафар бемор тузалди, вафот этганлар қайд этилмади. Бу ҳақда Хитой Соғлиқни сақлаш миллий комиссиясига таяниб, «РИА Новости» хабар берди.
Янги касалланиш бўйича ҳар икки ҳолат Шанхайда қайд этилган бўлиб, у четдан юқтирилган. Мамлакатда коронавирусни четдан юқтириш бўйича жами 1 678 та ҳолат аниқланган бўлиб, айни пайтда беморларнинг 278 нафари даволанмоқда, 5 нафари оғир аҳволда.
Коронавирус пандемияси бошланганидан буён мамлакатда 83 968 киши вирус юқтириб олган, уларнинг 78 870 нафари соғайган, 4637 нафар бемор вафот этган.
Жанубий Кореяда эса сўнгги сутка ичида коронавирус билан касалланиш бўйича яна 2 та ҳолат аниқланди, 1 киши вафот этди.
Коронавирус пандемияси бошланганидан буён мамлакатда 10 806 киши вирус юқтириб олган, беморларнинг 9 333 нафари соғайган, 255 нафари вафот этган. Жанубий Кореяда 5 апрель куни COVID-19 билан касалланиш бўйича 2 та ҳолат аниқланган бўлса, 30 апрель куни бирорта ҳолат қайд этилмаганди.
Мамлакатда коронавирусни аниқлаш бўйича 624 мингдан ортиқ тест ўтказилган. Коронавирусдан даволаниб, касалхонадан жавоб берилганидан кейин ҳам камида 353 киши организмида вирус борлиги аниқланган. Аввалроқ организмда антитана борлиги инфекция хавф солмаслигини англатмаслиги аниқланганди. Коронавирусдан тузалган одамлар қайта касалланишдан ҳимояланганликларини исботловчи далиллар йўқлиги ҳақида ЖССТ ҳам огоҳлантирганди.
Жанубий Корея 6 майдан бошлаб фақат эҳтиёткорлик ва профилактика чораларига риоя қилишни кўзда тутувчи «кундалик ҳаётдаги карантин» режимига ўтди. Мактаб ва жамоат муассасалари кичик тузатишлар билан одатий фаолиятига қайтмоқда. Аммо фуқаролар вирус юқишининг олдини олиш учун масофа сақлаш, қўлларни дезинфекциялаш, ниқоб тақиш каби асосий профилактик чораларга риоя этишлари лозим.
Коронавирус билан боғлиқ эпидемиологик вазиятнинг энг юқори «қизил» даражаси ўз кучида қолади, аммо уни камайтириш масаласи шароит ўзгаришига қараб кўриб чиқилиши мумкин.
Изоҳ (0)