АҚШда коронавирус билан касалланганлар сони 1,2 миллион кишидан ошиб кетди. Бу ҳақда вирус тарқалишини реал вақтда кузатиб бораётган Жонс Ҳопкинс университети маълумотларида келтирилган.
Тошкент вақти билан соат 10:00 ҳолатига кўра, АҚШда янги турдаги COVID-19 коронавирус инфекциясини юқтириб олганлар сони 1 204 475 кишини ташкил этмоқда. Бутун мамлакат бўйлаб коронавирус қурбонлари сони 70,8 минг кишига етди, қарийб 190 минг бемор даволанишга муваффақ бўлган.
Ҳукумат бу каби юқори кўрсаткичларни коронавирус учун тестлар фаол тарзда ўтказилаётгани билан изоҳлаган.
Аввалроқ АҚШда коронавирус қурбонлари сони 134 минг кишига етиши мумкинлиги прогноз қилинган эди. Президент Трамп администрацияси 1 июнга бориб COVID-19’дан вафот этган мамлакат фуқароларининг сони икки баробар кўпайишини тахмин қилган.
Ўзбекистонда 6 май соат 10:00 ҳолатига кўра, коронавирус инфекциясини юқтириб олганлар сони 2217 нафарга етди. Мамлакатда 15 мартдан буён коронавирусга чалинган беморларнинг 10 нафари вафот этди, 1501 нафари эса соғайган. Айни вақтда 706 киши даволанишда қолмоқда.
Изоҳ (0)