Daily Telegraph газетасида ғарб махсус хизматлари ҳисоботига таяниб эълон қилинган Хитой коронавирус ҳақидаги маълумотларни яширганлиги тўғрисидаги хабар АҚШ томонидан берилган бўлиши мумкин, деб ёзмоқда The Guardian. Нашрнинг ёзишича, шундай йўл билан АҚШ, эҳтимол, Хитойга босим ўтказмоқчи бўлган.
Гап The Daily Telegraph’нинг АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб ёзган мақоласи ҳақида кетмоқда. Унда Хитой коронавирусни яратиш бўйича ўтказган лаборатория тадқиқотлари ҳақидаги далилларни йўқ қилиб юборгани ёзилган.
The Guardian’нинг қайд этишича, бунга жавобан Австралия разведкаси газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган. «Менимча, бу контрпропаганда уюштириб, Хитойга босим ўтказиш йўли бўлган», — деган газета манбаси.
Британия раҳбариятидагилар ҳам ҳисобот Британия разведкасининг махфий маълумотларига асосланмаганлигини таъкидлади, деб ёзмоқда The Guardian ўз манбаларига таяниб.
Эслатиб ўтамиз, The Daily Telegraph’нинг хабарда тилга олинаётган материали 2 май куни эълон қилинганди. Унда Пекинда ўтган йилнинг декабрь ойи бошида инфекциянинг одамдан одамга юқиши борасида далиллар бўлгани, бироқ бу 20 январга қадар яшириб келингани айтилган.
Мавзуга доир: АП: Хитой дори-дармон ва ҳимоя воситаларини тўплаб олиши учун коронавирус ҳақидаги маълумотларни яшириб келган
АҚШда коронавирус лаборатория шароитида яратилганини исботловчи далиллар борлигини Дональд Трамп ва давлат котиби Майкл Помпео билдирганди. Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.
Мавзуга доир: Трамп: «Хитой коронавирус борасида катта хато қилди»
Изоҳ (0)