Коронавирус пандемияси даврида ўз ҳаётини хавф остига қўйиб, ишини сидқидилдан адо этаётган инсонлар бор. Булар кўча супурувчилар, сотувчилар, жамоат транспорти ишчилари, тиббиёт ходимлари ва бошқалар. The Guardian ана шундай касб эгаларининг суратлари жамланмасини тақдим этди.
Испания, Валенсия
Отлиқ полиция офицери Ҳелана Гонсалво Санчес. Санчеснинг фикрича, ватани қийин вазиятда қолган ушбу даврда ишлаш унинг учун шараф.
Жазоир
Нассиба Белгерби, фамацевт. «Фармацевтлар аҳолининг хабардорлигини ошириш, уларга вирусдан ҳимояловчи воситалар тарқатиш билан шуғулланган дастлабки тиббиёт ходимларидир. Бу бизнинг вазифамиз. Биз вазифамизни фахр билан бажармоқдамиз», — дейди Нассиба.
Шотландия, Глазго
Робин Барклай, кўча тозалаш бўйича пудратчи. Барклай ҳудудларни дезинфекция қилиш орқали коронавирус тарқалишини камайтиришига, одамларда умид уйғотишига ишонади.
Япония, Токио
Кунио Ҳаякава, балиқ сотувчи. Ҳаякава ҳамшаҳарларига қулайлик яратиш учун дўконини очиқ қолдиришга қарор қилди. Унинг айтишича, пандемия даврида ҳам мижозлар сони ўзгаришсиз қолган.
Швейцария, Лозанна
Ямилет Парра, 47 ёш, автобус ҳайдовчиси. Лозанна жамоат транспортида ҳайдовчи ўтирадиган ўриндиқ алоҳида тўсиб қўйилган, ҳар бир ҳайдовчида дезинфекция воситалари бор.
Португалия, Лиссабон
Эмилия Ломба, Лиссабондаги Бенфика бозорида балиқ сотади.
Ломба уйида оиласи билан қолиб, кўпроқ хавфсизликни таъминлаши мумкинлигини билади, лекин у бозорда мижозлари билан мулоқот қилиш имкониятига эгалигидан ўзини омадли ҳисоблайди.
Ҳиндистон, Фаридобод
Ранжан Бинд, чиқинди йиғувчи. Ҳар куни ишлайдиган бу йигитнинг ягона ҳимоя воситаси юзини ёпадиган мато.
Ливан, Амчит
Рияд, АЁҚШ ишчиси. У Аллоҳ инсонга қандай тақдир битган бўлса, ҳаммаси шундай бўлишига ишонади.
АҚШ, Майами
Грегорий Старк, 54 ёш. Кийимлар ювиш хизматида ишлайди. Старк ўз хавфсизлиги учун ҳар куни ниқоб ва қўлқопда ишлайди.
Афғонистон, Кобул
Зайнаб Шарифи, нонвой. Етти фарзанднинг онаси агар у ишламаса, очлик оиласини коронавирусдан аввал ўлдиришини айтади.
Туркия, Истанбул
Бўлент Чобан, сув тарқатиш компанияси ходими. Чобан пандемия шароитида ишлаш хавфсиз эмаслигини яхши тушунади, лекин оила боқиш учун ишлашга мажбур.
Ҳиндистон, Мумбай
Лалита Кешарвани, сабзавот сотувчи. У эри билан 22 йилдан бери шу иш билан шуғулланади.
Жанубий Африка, Йоханнесбург
Ризе Жакобс, мактаб ўқитувчиси. Жакобс оч фуқароларга овқат тайёрлаб, тарқатиш билан шуғулланадиган ошхонада кўнгилли ошпаз сифатида фаолият юритади.
Мексика, Тихуана
Габриэла Санчес, психолог. У Эспаcио мигрантларга бошпана хизматлари кўрсатиш бўйича марказда ишлайди. Санчес бир ойда ўртача 200 та психологик сеанс ўтказади.
Португалия, Лиссабон
Мария да Пас Парейра, Лиссабон ҳайвонот боғида приматларга қарайди. У ҳайвонот боғини хавфли ҳудуд деб ҳисобламайди.
Ҳартли Уинтни, Буюк Британия
Дейв Стентон, қассоб. У жамиятга фойдаси тегиши учун ишлашда давом этмоқда.
Испания, Барселона
Керолайн Беллз, 50 ёш, бошқотирмалар дўкони сотувчиси. Аёл икки нафар ишчи билан қўлқоп ва ниқобларда ишлайди. У бир ўзи яшагани, велосипедда ишга қатнагани учун хавфли вазият юзага келтирмаётганини айтади.
Сербия, Младеновац
Рената Гажик, супермаркет ишчиси.
Аргентина, Буэнос-Айрес
Сюзанна Туара, кўкат сотувчи. Одамлар ундан дўконни ёпмасликни сўраган, унинг ўзига ҳам ишлаш ёқади.
Франция, Мюлуз
Дезирия Вагнер, дафн этиш хизмати агенти. Вагнернинг иш тартиби пандемия даврида ўзгариб кетди. Энди жасадларни маросимга тайёрлаш керак эмас, оилавий йиғинлар ҳам йўқ.
БАА, Дубай
Аржун Шреста, кўча тозаловчи. Непаллик эркак оиласини боқиш учун ишлашда давом этмоқда.
Изоҳ (0)