Дональд Трамп АҚШда коронавирусдан вафот этиши мумкин бўлганлар сони бўйича янги прогнозларни маълум қилди

АҚШ президенти Дональд Трампнинг маълум қилишича, АҚШда коронавирус оқибатида вафот этадиган беморлар сони 75 мингдан 100 минг кишигача етиши мумкин. Бунга қадар Трамп кутилаётган қурбонлар сони бўйича бир нечта прогнозни маълум қилганди, деб ёзмоқда Reuters.

«Бу даҳшатли. Биз бу кўрсаткичдан ортиқ бирорта ҳам одамни йўқотмаслигмиз керак», — дея таъкидлаган АҚШ президенти.

Апрель ойининг бошида Оқ уй коронавирусдан кутилаётган қурбонлар сони бўйича расмий прогнозларни маълум қилган эди. Ўшанда экспертлар берган маълумотларга кўра, агар АҚШда ҳукумат томонидан жорий қилинган чекловларга амал қилинса, мамлакатда коронавирус қурбонлари сони 100 мингдан 240 минг нафаргача бориши мумкинлиги тахмин қилинган. Шунингдек, мутахассислар воқеалар ривожи ёмон тус олса, қурбонлар сони 2,2 миллион кишини ташкил этиши мумкинлигини билдирган. Қайд этилишича, бу ҳолат инфекция тарқалишига қарши кураш учун ҳеч қандай чора кўрилмаган тақдирда юз бериши мумкинлиги прогноз қилинган.

Апрель ойининг ўртасида Трамп АҚШ ҳукуматининг янги прогнозларини маълум қилди. Унга кўра, АҚШда коронавирусдан ўладиган одамлар сони 100 минг нафардан «сезиларли даражада кам» бўлади. Трамп кутилаётган қурбонлар сонини камайтиришга мамлакатнинг одамларни қутқариш бўйича қатъий сиёсати туфайли эришилганлигини таъкидлаган ва касаллик билан боғлиқ вазиятнинг ижобий томонга ўзгараётганини қайд этган.

Яна бир ҳафта ўтгач, АҚШ президенти мамлакатда пандемия қурбонлари сони 60-65 минг кишини ташкил этиши мумкинлигини айтган. Унинг сўзларига кўра, кутилаётган қурбонлар сонини аниқлаштиришга мамлакат ҳукумати томонидан коронавирусга қарши курашда кўрилаётган чоралар имкон берган.

Трамп 1 май куни АҚШда коронавирус қурбонлари сони 100 минг кишидан кам бўлишига умид қилаётганини маълум қилган.

Жонс Ҳопкинс университети маълумотларига кўра, АҚШда айни пайтга қадар 67 682 киши коронавирус қурбонига айланган. Ўлим ҳолатларининг катта қисми, яъни 18 925 таси Нью-Йоркда қайд этилган.

Аввалроқ Дональд Трамп коронавирус вакцинаси йил охиригача тайёр бўлишига ишончи комиллигини билдиргани ҳақида хабар берилганди. АҚШ ҳукумати коронавирус қурбонлари учун олдиндан юз мингта дафн қопига буюртма бергани маълум бўлди. Нью-Йоркда ичида ўнлаб чириётган жасад бўлган юк машинаси топилди.