Жонс Ҳопкинс университети маълумотларига кўра, айни пайтда дунё бўйлаб 3,5 миллиондан ортиқ одам коронавирусга чалинган. Салкам икки ҳафта аввал, 21 апрель куни, касалланиш ҳолати 2,5 миллионтага етганди, деб хабар бермоқда «РИА Новости».
4 май ҳолатига кўра, коронавирус инфекциясини юқтириб олиш бўйича дунёда 3 502 126 та ҳолати қайд этилган, касаллик оқибатидан 247 мингдан ортиқ киши вафот этган, 1,1 миллиондан ортиқ бемор соғайган.
Касалланганлар сони бўйича биринчи ўринда АҚШ бўлиб, у ерда 1,1 миллион кишида коронавирус аниқланган. Шунингдек, коронавирус қурбонлари сони (67,4 минг киши) бўйича ҳам биринчи ўринда турибди. Бироқ 16 апрель куни мамлакат раҳбари Дональд Трамп хабар берганидек, АҚШ коронавирус билан касалланишнинг энг юқори чўққисидан ўтди.
Касалликка чалинганлар сони бўйича АҚШдан кейинги ўринларда Испания ва Италия турибди. Уларда 217,4 минг ва 210,7 минг киши касалланган. Ушбу икки мамлакатда ҳам апрель ойи ўрталарида касалланиш ва ўлим ҳолатлари камайгани қайд этилган.
Касалликка чалинганлар сони бўйича кейинги ўринларни Буюк Британия (187,8 минг киши), Франция (168,8 минг) ва Германия (165,6 минг) эгаллаб турибди. Россия ушбу рўйхатда 134,6 мингта касалланиш ҳолати билан еттинчи ўринда.
Мавзуга доир: Олимлар коронавирус сабаб кузатилаётган ўлим ҳолатларининг кўплигини Д витамини етишмовчилиги билан боғламоқда
Жаҳон соғлиқни сақлаш ташкилоти 1 май куни коронавирус пандемияси туфайли глобал фавқулодда вазият режимини ўз кучида қолдирди. 23 январь куни, 600 киши инфекция юқтириб олгани маълум бўлганида, ЖССТ касалликнинг тарқалишини фавқулодда вазият деб тан олишдан бош тортди, аммо бир ҳафта ўтгач, 6 мингдан ортиқ одам юқтирганида ташкилот ўз қарорини ўзгартирди. 11 март куни ЖССТ коронавирус тарқалишини пандемия деб баҳолади.
Миннесота университети ҳузуридаги Юқумли касалликлар бўйича тадқиқотлар маркази мутахассисларининг фикрига кўра, коронавирус пандемияси бир неча йил давом этиши мумкин ва дунё аҳолисининг учдан икки қисми вирусни юқтириб, унга иммунитетга ҳосил қилмагунича кузатилади. Мамлакатлар томонидан инфекцияга қарши курашиш бўйича кўрилган чораларга қарамай, келажакда коронавирус тарқалишда давом этади, 2022 йилдан кейин унинг янги ҳолатлари пайдо бўлиши мумкин, дейди мутахассислар.
Изоҳ (0)