Хитой коронавирус пайдо бўлганидан сўнг катта хато қилди ва буни яширишга ҳаракат қилди, деди АҚШ президенти Дональд Трамп Fox News телеканалига берган интервьюсида.
«Менинг фикримча, улар (Хитой ҳукумати) даҳшатли хатога йўл қўйди ва буни тан олишни истамади. Биз (тергов ўтказиш учун Хитойга) боришни хоҳладик, аммо улар бизни киритишни истамади, ҳатто Жаҳон соғлиқни сақлаш ташкилотини ҳам киритишмади. Улар буни тан олди, лекин дарҳол эмас, анча кейинроқ. Менимча, улар хато қилиб қўйиб буни яширишга уринди, худди ёнғинни ўчиришга ҳаракат қилгандек. Лекин бунинг уддасидан чиқа олишмади», — деган Трамп.
Дональд Трампнинг айтишича, уларнинг энг салбий қарори — Хитойга киришни чеклаб, лекин ўз фуқароларига АҚШ ва бошқа мамлакатларга чиқишни тақиқламаганидир.Аввалроқ Fox News телеканали коронавируснинг Уханда лаборатория шароитида яратилганини тахмин қилганди. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.
АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган ҳисоботда Хитой ҳукумати коронавирус пайдо бўлишига оид ҳар қандай маълумотни яшириб, шу орқали бошқа мамлакатларни хавф остига қўйгани, шунингдек, Хитой COVID-19 борасида лабораторияларда ўтказилган тажрибаларга оид далилларни ҳам йўқ қилиб, вакцина яратиш устида иш олиб бораётган хорижлик олимларга биоматериалларни тақдим этишдан бош тортгани баён этилган.
Айни пайтда дунё бўйлаб коронавирусга чалинганлар сони 3,5 миллион кишидан ошиб кетди.
Изоҳ (0)