Маулен Ашимбаев Қозоғистон Сенатининг янги спикери этиб тайинланди, у ушбу лавозимда собиқ президент Нурсултон Назарбоевнинг қизи Дариға Назарбоеванининг ўрнини эгаллади. Бу ҳақда “Zakon.kz” нашри хабар берган.
Депутатлар унинг номзодини бир овоздан маъқуллаган. Ашимбаев номзодини мамлакат президенти Қосим-Жўмарт Тўқаев таклиф этган.
Ашимбаев ўзининг асосий йўналишлари сифатида коронавирус эпидемиясига қарши курашиш ва сиёсатда Қозоғистоннинг биринчи президенти томонидан илгари сурилган ташаббусларни қўллаб-қувватлаш эканлигини қайд этди.
Ашимбаев аввал президент администрацияси раҳбарининг биринчи ўринбосари лавозимида фаолият олиб борган ва президентнинг маслаҳатчиси ҳисобланарди.
Эслатиб ўтамиз, 2 май куни Тўқаев Дариға Назарбоеванинг ваколатларини тугатиб, уни парламент спикерлигидан озод қилганди. Тожикистон оммавий ахборот воситалари миллий ассоциацияси раиси Нуриддин Қаршибоев Назарбоеванинг ишдан олиниши Қозоғистонда сиёсий гуруҳлар ўртасида кураш бошланганини англатиши мумкинлигини таъкидлаган. У собиқ сенаторнинг сиёсат майдонини тарк этмаслигини ва Дариға Назарбоевага бошқа иш топиб қўйилгани, ушбу жараён унинг отаси Нурсултон Назарбоев билан келишилганини тахмин қилган.
Telegram’даги @davletovuz каналида ушбу ўзгаришлар таҳлил қилиниб, Дариға Назарбоева давлат раҳбари бўлади, деган гап-сўзлар, версиялар батамом ўз кучини йўқотганлиги қайд этилган.Дариға — Назарбоевнинг катта қизи, у 2019 йил 20 мартдан бери Қозоғистон Сенати спикери сифатида фаолият кўрсатиб келаётган эди. Тўқаев уни 2019 йил августида сенаторликка қайта тайинлаган, сентябрда эса у Сенат раиси лавозимига қайта сайланган.
Изоҳ (0)