Россияда сўнгги бир сутка ичида 10 581 кишида коронавирус аниқланди. Мамлакатда касалланганларнинг умумий сони 145 268 кишига етди, улардан 125 817 киши айни пайтда даволанмоқда. Касалликдан 1356 киши вафот этган. Бу ҳақда Касалликка қарши кураш бўйича тезкор штаб хабар берди.
Вирус энг фаол тарқалаётган ҳудуд Москва шаҳри бўлиб қолмоқда, шаҳарда сўнгги бир суткада 5795 та янги ҳолат қайд этилган. Москвада касалланганлар сони 74 401 кишига етган — бу вирусни юқтириб олиш бўйича мамлакатда касалланганларнинг ярмидан кўпини ташкил қилади.
Бундан ташқари, Москва вилоятида ўтган бир суткада 803 кишида коронавирус аниқланган, Санкт-Петербургда эса бу кўрсаткич 317 кишини ташкил қилган.
Россияда сўнгги бир суткада 1456 киши коронавирусдан тузалган, мамлакат бўйича соғайганларнинг умумий сони 18 095 кишига етган.
Апрель ойининг ўртасидан буён Россия касалланганлар сони бўйича дунёда ўнинчи ўриндан еттинчи ўринга кўтарилди. Бу вақт ичида Россия мазкур кўрсаткич бўйича Хитой, Эрон ва Туркиядан ўтиб кетди. Айни пайда дунёда АҚШ биринчи ўринда турибди, мазкур мамлакатда коронавирусга чалинган 1,1 миллион киши қайд этилган. Ундан кейинги ўринларни Испания 217,4 минг, Италия 210,7 минг бемор билан эгаллаб турибди. Жонс Ҳопкинс университети маълумотларига кўра, бутун дунё бўйича коронавирусга чалинган беморлар сони 3,5 миллион кишидан ошди.
Изоҳ (0)