Наманган шаҳридаги Тошматовлар оиласи Наврўз байрамида — 21 март куни Фарғона шаҳрида меҳмонда бўлиб, уч нафар фарзандини бувисининг уйида қолдириб келганди. Шундан сўнг жорий этилган карантин тартиби туфайли ота-онанинг болалари билан дийдор кўришиши бир ойдан кўпроққа чўзилган, деб хабар бермоқда «Дарё» мухбири Азизбек Абдувалиев.
— Фарзандларим бувисининг уйида бўлса ҳам, ҳар куни қўнғироқлашсак ҳам барибир қаттиқ соғингандик. Улар қачон олиб кетишимизни сўраб, йиғлашарди, — дейди Элёрбек Тошматов.
Оила бошлиғи Элёрбек Тошматов вилоят ҳокими Хайрулло Бозоровга Facebook ижтимоий тармоғи орқали мурожаат қилиб, фарзандларини олиб келиш ёки турмуш ўртоғини Фарғона шаҳрига етказишда ёрдам сўраган. Мурожаат эътиборсиз қолмади.
Миллий гвардия Наманган вилоят бошқармаси ходимлари 24 апрель куни махсус хизмат машинасида Фарғона вилоятидан Тошматовларнинг фарзандларини Наманганга олиб қайтди. Хонадон аъзоларининг дуосини олган йигитлар эса навбатдаги хизмат сари йўл олди.
Изоҳ (0)