Ўзбекистонда пандемияга қарши аввалдан зарур чоралар кўрилиб, аҳоли учун тўртта тоифада тиббиёт муассасалари шай ҳолатга келтирилган. Бу ҳақда ССВ Даволаш-профилактика ёрдамини ташкиллаштириш бош бошқармаси бошлиғи Фаррух Шарипов маълум қилди.
Унинг айтишича, дунёда коронавирус пандемияси Жаҳон соғлиқни сақлаш ташкилоти томонидан 2020 йил 11 март куни эълон қилинган бўлса, Ўзбекистонда биринчи бемор қайд этилишидан қарийб икки ой олдин Президент томонидан эпидемия тарқалишининг олдини олиш ҳамда эпидемик вазият барқарорлашгунга қадар унга қарши комплекс чора-тадбирлар амалга оширилган эди.
«Эпидемияга қарши тадбирлар билан бир қаторда Қорақалпоғистон Республикаси, вилоятлар ва Тошкент шаҳрида аҳолига ўз вақтида, сифатли ихтисослаштирилган тиббий ёрдамни кўрсатиш учун кўплаб зарур чоралар амалга оширилмоқда. Жумладан, мавжуд тиббиёт муассасалари катталар ва болалар учун 4 тоифада қайта ихтисослаштирилиб, тайёрланди», — дейди Фаррух Шарипов.
Унинг айтишича, биринчи навбатда, Ўзбекистон бўйича COVID-19 инфекцияси билан касалланган ҳамда гемодиализга муҳтож беморлар учун 16 586 та шифо-ўринга эга 80 та даволаш-профилактика муассасалари, шунингдек, COVID-19 инфекцияси билан касалланган ҳомиладор аёллар учун эса 340 шифо-ўринга эга 13 та туғруқ комплекси шай ҳолатга келтирилди.
Иккинчидан, мазкур инфекция билан касалланганлар билан мулоқотда бўлган, шошилинч тиббий ёрдам хизматига, шунингдек, гемодиализ ёрдамига муҳтож беморлар учун 1860 та шифо-ўринга эга 14 та даволаш-профилактика муассасаси, коронавирус билан касалланганлар билан мулоқотда бўлган ҳомиладор аёллар учун эса 740 шифо-ўринга эга 14 та туғруқ комплекси ажратилди.
Шунингдек, инфекция аниқланмаган ва беморлар билан мулоқотда бўлмаган аҳолининг қолган қисми учун фтизиатрия, эндокринология, онкология, нейрохирургия, нефрология, гематология, наркология, акушерлик ва гинекология, руҳий касалликлар, қон марказлари, гемодиализ бўлимлари, туман ва шаҳар тиббиёт бирлашмалари, жами 78 284 та шифо-ўринга эга даволаш-профилактика муассасалари хизмат кўрсатиши белгиланди.Тўртинчи тоифа сифатида инфекция аниқланмаган ва мулоқотда бўлмаган, кечиктирилмайдиган ва шошилинч тиббий ёрдамга муҳтож беморлар учун 1586 та шифо-ўринга эга 210 та даволаш-профилактика муассасаси тайёрлаб қўйилган.
Барча даволаш-профилактика муассасалари малакали тиббий кадрлар, керакли миқдордаги дори воситалари, тиббий асбоб-ускуналар, буюмлар ҳамда шахсий ҳимоя воситалари билан таъминланган.
«Ушбу кўрилган чора-тадбирлар, ривожланган давлатларни шошириб қўйган бир пайтда, пандемияга қарши курашишда ўз самарасини бермоқда. Шунингдек, касалланганларни халқаро стандартлар асосида даволаш чораларининг тўғри амалга оширилгани туфайли шифо топганлар ҳам кундан кунга кўпайиб бормоқда», — дея ўз сўзларини якунлаган Фаррух Шарипов.
Маълумот учун, 2020 йил 27 апрель соат 18:15 ҳолати бўйича жами 103 нафар бемор тузалиб, Ўзбекистонда коронавирусдан соғайганларнинг умумий сони 892 нафарга етди. Вирус аниқлангандан буён қайд этилган жами касалланиш ҳолатлари эса 27 апрель соат 22:00 ҳолатига кўра, 1904 тани ташкил этмоқда. Ўзбекистонда 15 мартдан буён коронавирусга чалинган беморларнинг саккиз нафари вафот этди.
Изоҳ (0)