«Ўзбекистон Республикасида ягона электрон чипта сотиш тизимини жорий этиш чора-тадбирлари тўғрисида»ги Вазирлар Маҳакамасининг қарори лойиҳаси муҳокама учун жойлаштирилган эди. Мазкур қарор лойиҳаси юзасидан Монополияга қарши курашиш қўмитаси томонидан тегишли таклифлар (эътирозлар) билдирилди ва белгиланган тартибда лойиҳа ишлаб чиқувчига юборилган. Бу ҳақда қўмита ахборот хизмати хабар берди.
Лойиҳага кўра, чипта сотишнинг ягона электрон тизими яратилиб, UzCard 51 фоиз улуш билан ва Маданият ва санъатни ривожлантириш жамғармаси 49 фоиз улуш билан оператор устав капиталида иштирок этиши режалаштирилмоқда.
Монополияга қарши курашиш қўмитаси ҳозирги кунда республикада «Ўзбекистон темир йўллари» АЖ (e-ticket.railway.uz), Uzbekistan Airways АЖ (uzairways.online), «Ўзавтовокзал сервис» ДУК (avtoticket.uz) томонидан онлайн чипталар сотиш, шунингдек, интернет тармоқлари орқали кино, театр, концерт ва спорт тадбирлари учун (iticket.uz ва myticket.uz) онлайн чипталар сотиш йўлга қўйилганлиги ва самарали фаолият юритаётганлигини қайд этган.
Иқтисодиётда давлат иштирокини камайтириш, хусусий мулк ҳуқуқини ҳимоя қилиш ва унинг устувор мавқейини янада кучайтириш, кичик бизнес ва хусусий тадбиркорлик ривожини рағбатлантиришга қаратилган институционал ва таркибий ислоҳотларни давом эттириш мақсадида Ўзбекистон ривожлантиришнинг бешта устувор йўналиши бўйича Ҳаракатлар стратегияси ва «Рақобат тўғрисида»ги қонун талабларидан келиб чиқиб, бу соҳада хусусий тадбиркорлик фаолияти яхши йўлга қўйилганлиги ва соҳа жадал ривожланиб бораётганлигини инобатга олиб, қўшимча янги давлат иштирокидаги корхона ташкил этиш мақсадга мувофиқ эмаслиги билдирилган.
Бундан ташқари, лойиҳада барча мавжуд чипта сотиш ахборот тизимларини яратилаётган янги портал билан мажбурий интеграциялашни таъминлаш топширилган. Қўмитанинг изоҳига кўра, ушбу талаб ҳам «Рақобат тўғрисида»ги қонунга зид бўлганлиги сабабли чипта сотиш ахборот тизимларини ихтиёрийлик асосида портал билан интеграциялаши мумкинлигини кўзда тутиши лозим.
Шулардан келиб чиққан ҳолда, қарор лойиҳасидаги айрим нормалар юқорида кўрсатилган давлат рақобат сиёсати йўналишларига зид равишда киритилганлиги сабабли мазкур нормаларни қайта кўриб чиқиш ва операторни белгилашни рақобат тамойиллари асосидаги тартиботлар (танлов, тендер) орқали амалга оширилиши таклифи берилган.
Изоҳ (0)