Вазирлар Маҳкамасининг қарори билан коронавирус инфекциясини юқтирганликда гумон қилинган шахсларни уй шароитида карантинга жойлаштириш ва сақлаш вақтинчалик тартиби тўғрисидаги низом тасдиқланди. Бу ҳақда Адлия вазирлиги хабар берди.
Низомга кўра, коронавирус инфекцияси билан касалланган шахс аниқланганда Санитария-эпидемиологик осойишталик марказлари ҳамда ҳудудий ички ишлар органлари ходимлари томонидан дарҳол коронавирус инфекцияси аниқланган шахс билан мулоқотда бўлганларнинг рўйхати шакллантирилади.
Ички ишлар органлари Миллий гвардия органлари билан ҳамкорликда мулоқотда бўлган шахсларнинг рўйхатида кўрсатилган шахсларни дарҳол уй шароитида карантинга жойлаштирилиши ва сақланишини таъминлайди.
Мулоқотда бўлган шахслар 14 кун давомида ёки уларнинг соғлиғи ҳолатига кўра соғлиқни сақлаш органлари томонидан белгилаб берилган муддат давомида уй шароитида карантинга олинади. Мулоқотда бўлган шахс уй шароитида карантинга олинганда у билан бир уйда яшовчи барча шахслар карантинга олинади.
Уй шароитида карантинга олинган шахсларнинг карантин муддати давомида уйни тарк этиши қатъиян ман этилади, уларга кечиктириб бўлмайдиган тез тиббий ёрдам кўрсатиш билан боғлиқ ҳоллар бундан мустасно.
Уй шароитида карантинга олинган шахс билан бир уйда бўлган бошқа шахслар орасида коронавирус инфекцияси аниқланган тақдирда, қолган шахслар учун карантин муддати қайтадан бошланади.
Уй шароитида карантинга олинган шахслар карантин муддати давомида тиббиёт ходимлари томонидан ҳар куни 2 маҳал кўрикдан ўтказилади. Бунда биринчи кўрик соат 09:00 гача, иккинчи кўрик 16:00 гача амалга оширилиши лозим.
Маҳаллий давлат ҳокимияти органлари томонидан ҳафтада бир марта карантинга олинган уйнинг (хонадоннинг) теварак-атрофида дезинфекция тадбирлари ўтказилиши таъминланади.
Уй шароитида карантинга олинган шахсларда карантин муддатида коронавирус инфекцияси аниқланмаса, уларни уй карантинидан чиқариш бўйича соғлиқни сақлаш органлари томонидан қарор қабул қилинади.
Маълумот учун, Ўзбекистонда 240 мингдан ортиқ кишида коронавирус тести ўтказилди. Айми пайтда уй шароитида 62 825 нафар, стационар шароитда эса 18 254 киши карантинга олинган. Шу вақтга қадар 207 336 нафар (уй шароитида 174 441 нафар, стационар шароитида 32 895 нафар) фуқаро карантиндан чиқарилди.
Ўзбекистонда 27 апрель соат 22:00 ҳолатига кўра, жами касалланиш ҳолатлари эса 1904 тани ташкил этмоқда. 15 мартдан буён коронавирусга чалинган беморларнинг саккиз нафари вафот этди, 810 нафари эса соғайиб, реабилитацияга олинган.
Изоҳ (0)