Бухоро вилоятининг Олот ва Қоракўл туманларида гўёки Амударё сувлари қирғоқдан тошиб чиқиши мумкинлиги ҳақида аҳоли ўртасида асоссиз миш-мишлар тарқалган. Бу ҳақда Фавқулодда вазиятлар вазирлиги матбуот хизмати раҳбари Мурод Содиқов «Дарё»га маълум қилди.
Қоракўл ва Олот Амударё яқинида жойлашган.Харита: «Яндекс»
Маълум бўлишиа, 27 апрель куни кузатилган кучли шамол оқибатида электр таъминотида узилишлар юзага келгач, аҳоли ўртасида «электр бўлмаса, ‘Амузанг’ насос станцияси ҳам ишламайди, оқибатда Амударё сувлари тошиб чиқади» деган миш-миш тарқалиб кетган.
«Шу миш-миш сабаб одамлар яшаш жойини ташлаб чиққан. Аслида бу ёлғон тасаввур. Ҳозирда барча тегишли хизматлар, Миллий гвардия, ФВВ, ИИВ ходимлари у ерда бўлиб, тушунтириш ишлари олиб бориб, аҳолини яшаш жойларига қайтармоқда. Чунки бундай хавф йўқ», — деди ФВВ вакили.
Аввалроқ Амударё бўйида жойлашган Қоракўл ва Олот туманларида аҳоли оммавий тарзда Бухоро шаҳри томон кетишни бошлагани, бу йўлда одамлар нафақат енгил автомобиллар, балки юк машиналари ва трактор тиркамаларидан ҳам фойдаланаётгани ҳақида хабар берилган эди.
Эслатиб ўтамиз, Бухоро вилоятига 27 апрель куни Туркманистон ҳудудидан ёпирилган кучли шамол оқибатида камида 41 киши тан жароҳати олган, бир киши ҳалок бўлган, юзлаб автомобиллар, минглаб бино ва иншоотлар, ўн минглаб дарахтлар зарар кўрган.
Президент Шавкат Мирзиёев юзага келган фавқулодда вазият оқибатларини кўздан кечириш ва аҳоли билан тўғридан-тўғри мулоқот қилиш мақсадида Бухорога жўнаб кетган. У Қоракўл ва Олотдаги вазият билан танишиб, Олотда фаоллар иштирокида йиғилиш ўтказган.
Изоҳ (0)