Бош прокуратура 2020 йил 15 апрелда халқ депутатлари Наманган шаҳар кенгаши депутати Т.Муҳаммадиев ва ички ишлар ходимлари ўртасида содир бўлган низоли вазият юзасидан баёнот берди.
«Депутат ўз автомашинасида Наманган шаҳар, Янгиқўрғон кўчасида ташкил этилган блокпостига етиб келиб, шу ерда хизмат олиб бораётган ИИБ ходимларининг қонуний талабларига бўйсунмасдан, уларга қаршилик кўрсатган.
Айни ҳолатда Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш)да кўрсатилган жиноят аломатлари мавжудлиги сабабли Наманган шаҳар прокуратураси 16 апрель куни Т.Муҳаммадиевни жиноий жавобгарликка тортиш ва эҳтиёт чораси сифатида қамоққа олишга розилик бериш ҳақида халқ депутатлари Наманган шаҳар кенгашига тақдимнома киритган.
Шу куннинг ўзида мазкур тақдимномани кўриб чиққан Наманган шаҳар кенгаши 21-06-сонли қарор билан Т.Муҳаммадиевни жиноий жавобгарликка тортишга рухсат бериб, эҳтиёт чораси сифатида қамоққа олишни рад этган.
Мазкур ҳолат юзасидан кенгашнинг розилиги асосида шаҳар прокуратураси томонидан Жиноят кодексининг 219-моддаси билан жиноят иши қўзғатилган.
Бироқ орадан уч кун ўтиб халқ депутатлари Наманган шаҳар кенгашининг навбатдан ташқари ўтказилган сессиясида, амалдаги қонунчиликка зид равишда кенгашнинг 16 апрелдаги 21-06-сонли қарори бекор қилиниб, Т.Муҳаммадиевни жиноий жавобгарликка тортиш ва эҳтиёт чораси сифатида қамоққа олиш рад этилган.
21 апрелда мазкур ҳолатни бартараф этиш мақсадида Наманган вилояти прокурори томонидан халқ депутатлари Наманган вилояти кенгашига шаҳар кенгаши чиқарган қарорларни бекор қилиш ҳақида тақдимнома киритилган.
Ушбу тақдимнома 25 апрелда вилоят кенгашида кўриб чиқилиб, 16 апрелдаги 21-06-сонли қарори ўзгаришсиз қолдирилган (Т.Муҳаммадиевни жиноий жавобгарликка тортишга рухсат берилиб, эҳтиёт чораси сифатида қамоққа олиш рад этиш ҳақида) ҳамда 19 апрелда навбатдан ташқари сессияда чиқарилган қарор бекор қилинган.
Ҳозирда жиноят иши юзасидан тергов ҳаракатлари давом этмоқда», — дейилади Бош прокуратура баёнотида.
Аввал Наманганда шаҳар кенгаши депутати Т.Муҳаммадиев ҳамда ички ишлар ходимлари ўртасида низоли вазият содир бўлгани ҳақида хабар берилган, кейинчалик Наманган шаҳар кенгаши ЙПХ инспекторлари билан жанжаллашган депутатни ҳимоя қилгани ва энди вазият тескари айланиб кетиши мумкинлиги маълум қилинган. 23 апрелда Олий Мажлис Қонунчилик палатаси депутати, ЎзЛиДеП аъзоси Дониёр Ғаниев парламент 12 нафар аъзосининг ИИВ Пўлат Бобожоновга киритган таклифлари баён этилган мурожаатни эълон қилган ва унда наманганлик депутат ҳамда ЙПХ ходимлари ўртасидаги низоли вазиятнинг тўлиқ видеосини парламентга тақдим қилишни сўраган.
Изоҳ (0)