Ўзбекистон Президенти Шавкат Мирзиёев 27 апрель, душанба куни, геологияда амалга оширилаётган ишлар таҳлили ва галдаги вазифалар муҳокамасига бағишланган йиғилиш ўтказди. Бу ҳақда Президент матбуот хизмати хабар берди.
Йиғилишда қишлоқ хўжалиги ерларини сув билан таъминлаш масаласи ҳам муҳокама қилинди. Хусусан, қудуқлар қазиш учун ҳар бир туманга махсус техникалар етказилиши белгиланган.
Таъкидланишича, сўнгги уч йилда ерости сувларини мониторинг қилиш ва кадастрини юритиш такомиллаштирилди. 250 та кузатув қудуғида ерости суви параметрларини масофадан автоматик ўлчаш қурилмалари ўрнатилди.
Йиғилишда 3 минг гектарга сув чиқариш учун 70 та қудуқни бурғилаш бўйича вазифа қўйилди. Шунингдек, 2020 йилда 200 та янги қудуқда сув сарфини, 400 та қудуқда ерости сув сатҳини онлайн мониторинг қиладиган тизим жорий этиш ҳамда ерости сувлари интерактив харитасини яратиш зарурлиги таъкидланди.
Геология ривожида фундаментал, илмий, инновацион ва амалий тадқиқотларнинг ўрни катта. Шу боис йил якунигача 2,5 минг квадрат километр майдонни космик тасвирлар орқали, 5 минг квадрат километр майдонни аэрогеофизика усули орқали геологик ўрганиш юзасидан топшириқлар берилди.
Эслатиб ўтамиз, Шавкат Мирзиёев 24 апрель, жума куни, ўтказилган йиғилишда Фарғона ва Қашқадарёда фойдаланишдан чиққан ва лалми ерларда қудуқ қазиб, аҳолига бўлиб бериш зарурлигини қайд этганди. Бунинг учун Фарғонага 15 миллиард сўм, Қашқадарёга 11 миллиард сўм ажратилган. 22 апрель куни бўлиб ўтган йиғилишда эса Навоий вилоятида «Ҳар бир ёшга бир гектар» лойиҳаси доирасида ёшларга 840 гектардан зиёд бўш ётган ер майдонлари ажратиб берилгани, уларни суғориш учун 11 та янги қудуқ қазилгани маълум қилинганди. Шунингдек, қудуқ қазиб, 26 минг гектар майдонда ташкил этиладиган боғ, токзор ва иссиқхоналарда 52 минг, ипакчилик тармоғида 785 минг, қурилиш ва инфратузилма соҳасида 75 минг та янги иш ўрни яратиш мумкинлиги қайд этилганди.
Изоҳ (0)