Ўзбекистон Соғлиқни сақлаш вазирлиги Қорақалпоғистон Республикаси юқумли касалликлар шифохонасида 21 нафар коронавирус инфекциясига чалинган беморнинг ҳамда Тошкент шаҳридаги Вирусология илмий-текшириш институти клиникасида 12 нафар беморнинг тузалгани ва масъуллар иштирокида реабилитацияга кузатилганини хабар қилди.
Хабарга кўра, соғайганларнинг барчаси Қорақалпоғистондан (15 нафари Нукус шаҳридан, 4 нафари Мўйноқ туманидан, яна 2 нафари Қўнғирот туманидан) бўлиб, касалликни коронавирусга чалинганлар билан мулоқот қилиш оқибатида юқтириб олган.
Беморларнинг 9 нафари эркак, 12 нафари аёл, улар орасида энг ёши каттаси 64 да бўлса, энг кичиги 5 ёшда.
Қорақалпоғистонда 27 апрель соат 18:00 ҳолатига кўра, жами 50 нафар бемор коронавирусдан тузалган.
Шунингдек, Тошкентдаги Вирусология илмий-текшириш институти клиникасидан 12 нафар коронавирусга чалинган бемор Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Беморларнинг 7 нафари Тошкент шаҳрида, 1 нафари Бухоро вилоятида, 2 нафари Қашқадарё вилоятида ва яна 2 нафари Тошкент вилоятларида истиқомат қилади. Улар ҳам коронавирусга чалинганлар билан мулоқотда бўлиб, инфекция юқтириб олган. Тузалганларнинг энг ёши каттаси 65 да бўлса, энг кичиги 9 ёшда.
Клиникада айни пайтга қадар 110 нафар бемор соғайган бўлса, эндиликда улар 122 нафарга етди.
Аввал Ўзбекистонда яна 22 киши коронавирусдан тузалгани, Жиззахда касалланган беморлар қолмагани хабар қилинганди.
2020 йил 27 апрель соат 18:15 ҳолати бўйича жами 103 нафар бемор тузалиб, Ўзбекистонда коронавирусдан соғайганларнинг умумий сони 892 нафарга етди. Вирус аниқлангандан буён қайд этилган жами касалланиш ҳолатлари эса 27 апрель соат 10:00 ҳолатига кўра, 1887 тани ташкил этмоқда. Ўзбекистонда 15 мартдан буён коронавирусга чалинган беморларнинг саккиз нафари вафот этди.
Изоҳ (0)