Янгийўл тумандаги кўп тармоқли марказий шифохона ходимида COVID-19 вируси аниқланган. Бу ҳақда 27 апрель куни АОКАда бўлиб ўтган брифингда Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов айтиб ўтди.
Брифингда Янгийўл аҳолиси шаҳар кўп тармоқли марказий шифохонасида коронавирус аниқлангани тўғрисидаги хабарлардан безовта бўлаётгани сабабли ҳолат юзасидан расмий хабар бериш сўралди.
Коронавирусга қарши кураш штаби аъзоси Ҳабибулла Оқиловнинг маълум қилишича, ҳақиқатан, 22 апрель куни Янгийўл туман кўп тармоқли марказий шифохонасидаги ўрта тиббий ходимда COVID-19’га тест текширувида мусбат натижа тасдиқланган.
«Тартиб-қоидаларга кўра, кўп тармоқли шифохонанинг 198 нафар ходими ва улар билан алоқада бўлганлар Ўрта Чирчиқдаги карантин шаҳарчасига кузатиш учун жойлаштирилди», — деди у.
Штаб аъзосининг қўшимча қилишича, Янгийўл шаҳар маркази ва шифохона шифокор, беморлари билан бирга ёпилгани, коронавирус аниқланган шифокорларни эски сана билан меҳнат таътилига расмийлаштирилгани ҳақидаги гаплар ҳақиқатга тўғри келмайди.
Эслатиб ўтамиз, Ўзбекистонда 27 апрель соат 10:00 ҳолатига кўра, коронавирус инфекциясини юқтириб олганлар сони 1887 нафарга етди. Касалликка чалинган беморларнинг саккиз нафари вафот этган, 789 нафари эса соғайиб, реабилитацияга олинган.
Изоҳ (0)