Коронавирус инфекциясига қарши кураш, шунингдек, унинг мамлакатда тарқалишининг олдини олишга қаратилган халқаро ҳамкорлик доирасида Ўзбекистоннинг Сеулдаги элчихонаси Кореядан инсонпарварлик ёрдамини жалб қилди. Бу ҳақда «Dunyo» АА хабар бермоқда.
Қайд этилишича, умумий оғирлиги 34 тоннага яқин инсонпарварлик ёрдами Ўзбекистон Соғлиқни сақлаш вазирлиги эҳтиёжларидан келиб чиққан ҳолда, Жанубий Кореянинг Evergreen Motors, Hanshin E&C, Shindong Resources, BOMI E&C, GM Korea, GM, UNICO Logistics, Chung Hospital, Myung Sung Placon, Suwan TPL, Union Korea Pharm, Century, Infinity Co., Ltd., LH, Hyundai Engineering каби компаниялари ва Шинхан университети кўмагида шакллантирилди.
Бундан ташқари, Корея ташқи ишлар вазирлиги томонидан ажратилган 250 минг доллар миқдоридаги маблағ эвазига PCL Inc. компаниясининг 20 минг дона PSR диагностика тест тизимлари харид қилинди.
Қиймати 900 минг долларга яқин 6,2 тонна оғирликдаги юқори технологик тиббий ускуналар, автомат механизмли тиббий каравотлар ва ПЗР (полимераз занжир реакцияси) диагностика тест тизимлари Uzbekistan Airways авиакомпаниясининг махсус самолётида мамлакатга жўнатилди.Умумий оғирлиги 27,6 тоннадан ортиқ бўлган гуманитар юкнинг қолган қисми навбатдаги юк чартер рейси билан республикага етказилади.
Корё университети профессори Юн Синг Жу ҳам касалликка қарши курашда халқаро эксперт сифатида ушбу рейс билан Тошкентга келади. Кореянинг ёрдам юки Тошкентга 26 апрель куни кечки пайт етиб келган.
Эслатиб ўтамиз, дунёда коронавирус тарқалишига қарши кураш бошланганидан буён Ўзбекистон Хитойга, Эронга, Афғонистонга, Қирғизистонга, Тожикистонга, Беларусга, Озарбайжонга, Венгрияга инсонпарварлик ёрдами жўнатди. Ўз навбатида Ўзбекистон мазкур пандемияга қарши курашиш учун Хитой, БАА ва АҚШдан ёрдам олди.
Изоҳ (0)