Ўзбекистонда яна 22 киши коронавирусдан тузалди. Жиззахда касалланган беморлар қолмади

Ўзбекистонда 27 апрель куни яна 22 киши коронавирусдан тузалиб, реабилитацияга кузатилди. Бу ҳақда ССВ матбуот хизмати хабар бермоқда.

Наманган вилоятида 4 нафар бемор тузалган. Соғайганларнинг 1 нафари эркак, 3 нафари аёл барчаси ушбу вилоятдан. Уларнинг барчаси коронавирус инфекциясига чалинганлар билан мулоқотда бўлиб, касалликни юқтириб олган. Энг ёши каттаси 66 ёшда бўлса, энг ёши кичига 31 ёшда.

Жиззах вилоятида эса 2 нафар коронавирус инфекциясига чалинган беморлар буткул соғайди. Улар 33 ёшли ва 31 ёшли жиззахлик (эркак) беморлар бўлиб, касалликни коронавирус инфекциясига чалинганлар билан мулоқотда бўлиб юқтириб олган. Қайд этилишича, улардан сўнг касалхона коронавирусга чалинган бирорта бемор қолмаган.

Шунингдек, Тошкент тиббиёт академияси кўп тармоқли клиникасидан 14 нафар, Эпидемиология микробиология ва юқумли касалликлар илмий-текшириш институти клиникасидан эса 2 нафар бемор буткул соғайган.

Тошкент тиббиёт академияси кўп тармоқли клиникасида соғайганларнинг 7 нафари Тошкент шаҳридан, Самарқанд ва Сирдарё вилоятларидан 2 нафардан, Қорақалпоғистон Республикаси, Навоий ва Андижон вилоятларидан эса 1 нафардан. Улардан 9 нафари Туркиядан Истамбул–Тошкент йўналишида, 3 нафари Россиядан Москва–Тошкент йўналишида, 1 нафари эса Сеул–Тошкент йўналишида чартер рейслар орқали келишган ва карантинга олинган.

Коронавирус аниқлангач, клиникага ётқизилган. Қолган 1 нафари коронавирус инфекциясига чалинганлар билан мулоқот орқали касалликни юқтириб олган. Беморлардан 8 нафари эркак, 6 нафари аёл. Улар орасида энг ёши каттаси 63 ёшда бўлса, энг ёши кичиги 12 ёшда.

Эпидемиология, микробиология ва юқумли касалликлар илмий-текшириш институти клиникасида соғайиб чиққан 53 ёшли ва 38 ёшли беморлар (аёл) Тошкент шаҳридан бўлиб, коронавирус инфекциясига чалинганлар билан мулоқотда бўлиб, касалликни юқтириб олган.

Шундай қилиб, 27 апрель соат 15:12 ҳолатига кўра, Республика бўйлаб коронавирусдан буткул соғайганлар 826 нафарга етди. Вирус аниқлангандан буён қайд этилган жами касалланиш ҳолатлари эса 27 апрель соат 10:00 ҳолатига кўра 1887 тани ташкил этмоқда.