Соғлиқни сақлаш вазирлиги хабарига кўра 27 апрель куни Бухоро вилоят кўп тармоқли тиббиёт марказида 15 нафар бемор тўлиқ соғайди. Улар вилоят соғлиқни сақлаш бошқармаси масъуллари иштирокида реабилитацияга кузатилди.
Шифо топганларнинг барчаси Россиядан чартер рейс билан Бухорога олиб келинган ва карантинга олинган. Коронавирус инфекцияси тасдиқлангач, шифохонага жойлаштирилган. Улардан 13 нафари эркак, 2 нафари аёл. Беморларнинг 7 нафари Тошкент шаҳридан, Андижон ва Қашқадарё вилоятларидан 2 нафардан, Тошкент, Фарғона, Сирдарё ва Самарқанд вилоятларидан 1 нафардан. Улар орасида энг ёши каттаси 54 ёшда бўлса, энг ёши кичиги 16 ёшда.
Аввалроқ COVID-19’дан тузалганлар сони 789 нафарга етгани хабар берилган эди.
27 апрель соат 13:09 ҳолатига кўра, Ўзбекистонда коронавирус инфекциясидан бутунлай соғайган беморлар сони 804 нафарга етди. Вирус аниқлангандан буён қайд этилган жами касалланиш ҳолатлари эса 27 апрель соат 10:00 ҳолатига кўра 1887 тани ташкил этмоқда.
Изоҳ (0)