Болаларга инсон ҳуқуқлари ва ҳақиқатни гапиришни ўргатадиган «Зорблар» мультисериали ўзбек тилига таржима қилинди

Доха декларацияси доирасида яратилган «Зорблар» (The Zorbs) мультипликацион сериали ўзбек тилига таржима қилинди. Бу ҳақда Бош прокуратура академияси «Дарё»га маълум қилди.

Лойиҳа Ўзбекистон Бош прокуратура академияси, Халқ таълими вазирлиги ва Бирлашган Миллатлар ташкилотининг наркотиклар ва жиноятга қарши курашиш бўйича (UNODC) Марказий Осиёдаги бошқармаси билан ҳамкорликда амалга оширилган.

«Зорблар» мультипликацияси UNODC томонидан 2016 йилда яратилган бўлиб, 6 ёшдан 12 ёшгача бўлган болаларда ҳуқуқий онгни шакллантириш ва ҳуқуқий маданиятни ривожлантиришга қаратилган.

Фильмда болаларга адолат тушунчаси, киберхавфсизлик, инсон ҳуқуқлари, ҳақиқатни гапириш тўғрисида билим ва кўникмалар берилади. Шунингдек, мазкур мултипликацион сериалининг ўзбек ва рус тилидаги вариантларидан «Тарбия» дарслигининг 1—5-синфлар учун мультимедиа иловаларини яратишда фойдаланилади.

Мультипликацион сериални Ўзбекистон миллий телерадиокомпанияси тизимига кирувчи телеканаллар орқали намойиш этиш режалаштирилган.

Маълумот учун, Доха декларацияси 2015 йилда Бирлашган Миллатлар Ташкилотининг жиноят ва ҳуқуқбузарликнинг олдини олиш бўйича 30-Конгрессида қабул қилинган ташкилот Бош Ассамблеясининг 70/174-сонли резолюцияси билан тасдиқланган. Декларацияда ташкилотнинг жиноятчилик ва ҳуқуқбузарликнинг олдини олиш, ҳуқуқ устуворлигини таъминловчи маданиятни шакллантиришда болалар ва ёшлар таълимининг фундаментал моҳияти тан олинган.