Бухородаги Хўжа Калон масжиди олдидаги ҳовуз тегишли рухсатсиз бузилгани ва таъмирлаш ишлари олиб борилгани маълум бўлди

Ижтимоий тармоқларда Бухоро шаҳридаги Хўжа Калон масжиди ва минораси олдида олиб борилаётган таъмирлаш ишлари акс этган суратлар тарқалди. Суратларда масжид олдидаги ҳовуз ва унинг атрофи бузилганини кўриш мумкин. Қайд этилишича, таъмирлаш ишлари карантин даврида амалга оширилмоқда.

Ўзбекистон Маданият вазирлигининг маълум қилишича, вазирлик ҳузуридаги Маданий мерос департаменти Бухоро шаҳридаги XVI асрга мансуб Хўжа Калон масжиди ва минораси борасида ОАВларда тарқалаётган маълумотларга аниқлик киритмоқда.

2020 йилнинг 14 апрель куни Бухоро вилояти маданий мерос инспекцияси томонидан Бухоро шаҳар ҳокимлигига Хўжа Калон масжиди олдида таъмирлаш ишларини тўхтатиш тўғрисида хат киритилган.

Қайд этилишича, Вазирлар Маҳкамасининг 2019 йил 30 мартдаги «Ўзбекистон Республикаси Маданият вазирлиги ҳузуридаги Маданий мерос департаменти фаолиятини ташкил этиш ҳамда моддий маданий мерос объектларини муҳофаза қилиш ва улардан фойдаланишга оид айрим норматив-ҳуқуқий ҳужжатларни тасдиқлаш тўғрисида»ги 265-сонли қарорига мувофиқ, алоҳида муҳофаза қилинадиган тарихий ҳудудлар, тарихий-маданий қимматига кўра ЮНЕСКОнинг Умумжаҳон мероси рўйхатига киритилган ҳудудларда таъмирлаш-тиклаш ишларини олиб бориш Маданият вазирлиги ҳузуридаги Маданий мерос департаментидан махсус рухсатнома асосида амалга оширилади.

Вазирлик хабарига кўра, Бухоро шаҳридаги Хўжа Калон масжиди ва минораси 1573—1579 йилларда қурилган бўлиб, маданий мерос рўйхатига киритилган объект ҳисобланади.

Маълум қилинишича, ҳозирги кунда ёдгорлик олдида жойлашган ҳовузни таъмирлаш ишлари Бухоро вилояти ҳокимлиги томонидан амалга оширилмоқда. Аммо тартибга кўра, Ўзбекистон ҳудудида жойлашган барча моддий маданий мерос объектлари Маданият вазирлиги ҳузуридаги Маданий мерос департаментининг махсус рухсатномаси билан амалга оширилиши зарур. Маданий мерос департаментининг Илмий-эксперт кенгашига ўрнатилган тартибда ҳужжатлар тақдим этилган ҳолда, кенгашнинг хулосасига кўра тиклаш ишларини олиб бориш мумкин.

Воқеа юзасидан Маданий мерос департаменти ўрнатилган тартибда ҳужжатларни Ўзбекистон Республикаси Бош прокуратурасига тақдим этади.