Инсоннинг гўзаллиги у истеъмол қиладиган таом ва маҳсулотлар билан боғлиқ эканлиги бир эмас бир неча марта исботланган. Ҳеч қайси крем ёки восита табиий маҳсулотлардан олинадиган витамин ва минералларни бера олмайди. Гўзаллик, ёшлик ва терининг соғломлиги учун муайян витаминлар, микроэлемент ва ёғ кислоталари жавоб беради, Harper’s Bazaar нашри мазкур моддалар қайси маҳсулот таркибида бўлиши билан бўлишади.
Асал
Асал ширин ва калорияга бой маҳсулот бўлишига қарамай, унинг оз миқдори ҳам тери ҳолатининг яхшиланишига сабабчи бўлади. Унинг таркибидаги компонентлар терини ичидан озиқлантиради, таранглаштиради ва эластиклигини оширади. Асални бўтқа, йогурт ёки творогга қўшиб истеъмол қилинг. Аммо иссиқ ичимликларга қўшмасликка ҳаракат қилинг негаки, юқори ҳароратда унинг таркибидаги фойдали моддалар парчаланиб кетиб фақат шакар қолади.
Қулупнай
Қулупнай таркибида ҳатто бошқа цитрус мевалар таркибидан-да, кўпроқ C витамин борлиги ушбу мевани гўзал ва соғлом тери учун фойдаси кўплигини билдиради. C витамини кучли антиоксидант ҳисобланади. У терини турли радикаллар таъсиридан ҳимоя қилиш, коллаген ва эластин ишлаб чиқаришни таъминлаш ҳамда терига ажин тушишини олдини олиш хусусиятига эга. Қулупнайни исталган сутли маҳсулот билан, салат ёки йогуртга қўшиб истеъмол қилиш мумкин.
Ёнғоқ
Ёнғоқ — витамин E ва омега–3 ёғ кислотасининг манбаси ҳисобланади. Ушбу моддалар терининг озиқланишини таъминлайди, тери қуриши ҳамда унинг эрта қаришини олдини олади. Шунга қарамай, унинг таркибида калория кўплигини ёддан чиқармаган ҳолда меъёрида истеъмол қилиш керак. Бир кунда бир ҳовуч ёнғоқ истеъмол қилса етади.
Сули ёрмаси
Сули ёрмаси терини тинчлантириш ва озиқлантириш хусусиятига эга — оқсил ва микроэлементларга бой маҳсулот ҳисобланади. Шунингдек, тери намлигини сақлашда ҳам самарали восита ҳисобланади. Сули ёрмасини нонуштага асал, ёнғоқ ва мевалар билан қўшиб тайёрланг, бунда унинг таъсири янада фойдалироқ бўлади.
Сабзавотлар
Табиий каратиноид антиоксидантлари ҳамда бета-каротин сабзавотларнинг ёрқин ранги учун жавобгар ҳисобланади. Айнан улар сабзи, қовоқ ва ширин булғор қалампирига ранг беради. Организмга тушган бета-каротин А витаминига айланади, ушбу витамин эса тери ҳолатининг ёмонланиши, шунингдек, қаришига қарши самарали восита. У тери таранглиги, ялтираши, табиий гўзаллигини яхшилайди. Асосийси, А витаминининг ёғда эрувчанглигини ёдда тутган ҳолда истеъмол қилиш керак. Сабзавотлардан салат тайёрлаб, унга ёнғоқ ва ўсимлик ёғидан бир қошиқ қўшинг. Бундай салат истеъмолидан кейин тана ва терига фойдасини узоқ кутишингизга ҳожат қолмайди.
Изоҳ (0)