Ҳамма ҳам табиий гўзал бўлмаслиги мумкин, лекин ўзига қараб юриши бошқаларда яхши таассурот қолдириши аниқ. «Королевнам.ру» нашри аёллар ташқи кўринишида эътибор бериши керак бўлган жиҳатларга тўхталади.
Сочларингизга алоҳида эътибор беринг
Соч аёл кишининг кўрки ҳисобланади, соч тартибли кўриниши учун эса бир сутка ичида 3-4 соат вақт ажратиш шарт эмас, тоза ва тартибли кўринса бўлгани. Кийиниб-ясаниб, атир сепган билан сочлар кир ва таралмаган бўлса, умумий тасаввур ҳам шунга яраша бўлади.
Тирноқларингиз сиз ҳақингизда кўп нарса гапиради
Қўллар аёл кишининг қандай эканига таъриф беради. Маникюр қилинган, чиройли қўллар кишида яхши таассурот қолдиради. Маникюр узун тирноқ ва қип-қизил лакдан иборат бўлиши шарт эмас, асосийси, тирноқлар калталанган ва тартибланган бўлса кифоя.
Пойабзални тўғри танлаш
Атрофдагилар биринчи ташқи қиёфага, кейин эса пойабзалга қарашини биласизми? Йўқ бўлса, билиб олинг. Ташқи кўринишда, оёқ кийим танлаш, унинг озодалиги муҳим саналади. Эътибор марказида бўлиш учун икки қарич пошнали туфли кийиш шарт эмас, кроссовкада ҳам малика бўлишингиз мумкин. Муҳими, дид билан уйғун кийина билишда.
Кийиниш усуби
Кийиниш деганда гап урф ёки трендлар ҳақида эмас, қадди-қоматдан келиб чиққан ҳолда либос танлаш ҳақида кетмоқда. Мода ўзгаради, услуб эмас, шу боис кийиниш борасида ўз услубингизни топишга ҳаракат қилинг. Сиз танлаган либос қадди-қоматингизнинг устунликларини кўрсатиши, камчиликларини эса яшириши керак.
Ифор бу — сизнинг «ташриф қоғозингиз»
Аёл кишидан ҳамиша хушбўй ифор келиши керак, лекин бу борада меъёрни билган даркор. Ишхона ёки ўқув муассасаларида ўткир атир сепмаслик керак. Бундай атирларни тантана ва базмларда ишлатиш тавсия қилинади.
Макияжнинг меъёрини билиш
Аёл киши макияж билан янада гўзал кўринади, лекин ошириб юбориш аксинча таассурот қолдиради. Қошларнинг тартибга келтирилгани, юзнинг табиий қизғишлиги ва лабнинг ўз рангидан фарқ қилмаган даражада бўялиши табиий гўзалликка урғу беради. Чизилган қош, чапланган кўз ва юзнинг керагидан ортиқ қизартириб олиниши эътибор жалб қилишни истагандек тасаввур беради.
Изоҳ (0)