АҚШ ЖССТга ажратилиб келинган маблағларни соғлиқни сақлаш билан шуғулланадиган нодавлат ташкилотларига йўналтирмоқчи. Бу ҳақда мансабдорлар ва АҚШ давлат департаментига юборилган ҳужжатга таяниб, Washington Post хабар берди.
«АҚШ давлат котиби давлат департамент ва Халқаро тараққиёт агентлигидан ЖССТни чиқариб ташлаб, халқаро ёрдам дастурининг муқобил ижрочиларини топиш ва уни жалб қилишни сўради», — дейилади давлат департаменти ходимларига юборилган ҳужжатда.
Газета манбаларига кўра, АҚШ президенти Дональд Трамп ва унинг маслаҳатчилари ЖССТни бир неча фронт бўйича ортга суриш учун «саҳна орти» ишларини олиб бормоқда.
Дональд Трамп Жаҳон соғлиқни сақлаш ташкилотини молиялаштиришни тўхтатишини 15 апрель куни эълон қилганди. Президент ташкилотни коронавирус тарқалишига ўз вақтида етарлича эътибор қаратмаганда айбламоқда, бу эса ўз навбатида касалликнинг янада кенг тарқалишига сабаб бўлган.
АҚШ давлат котиби Майкл Помпео эса Fox News телеканалига берган интервьюсида Америка ЖССТни молиялаштириш масаласига бошқа қайтмаслиги мумкинлигини билдирган. БМТ бош котиби Антониу Гутерриш эса Трампнинг ушбу қарорини нотўғри вақтда қабул қилинган деб баҳолади.
Кейинчалик Bloomberg’нинг маълум қилишича, Помпео АҚШга етти мамлакатда полиомиелит ва коронавирусга қарши курашиш дастурлари доирасида ЖССТга молиявий ёрдам беришни давом эттиришни тавсия қилган.
Агентликнинг маълум қилишича, давлат департаментига юборилган хатда ЖССТ еттита мамлакат: Афғонистон, Миср, Ливия, Покистон, Судан ва Туркияда полиомиелит ва COVID-19’га курашишда муҳим роль ўйнаши таъкидланган.
АҚШнинг ЖССТни молиялаштиришдан воз кечганини эълон қилганидан бир ҳафта ўтганидан кейин Хитой ЖССТга қўшимча 30 миллион доллар ажратишини эълон қилган. 2018—2019-молиявий йилда ташкилотга АҚШ томонидан қарийб 900 миллион доллар маблағ ажратилган, Хитой эса ушбу давр мобайнида 85 миллион доллар берган.
Изоҳ (0)