Саудия Арабистони подшоҳи Салмон бин Абдулазиз ас-Сауд 26 апрелдан 13 майга қадар Макка ва изоляциядаги бир қатор туманлардан ташқари қолган барча минтақаларда комендантлик соатини қисман бекор қилиш бўйича топшириқ берди. Бу ҳақда мамлакат раҳбарининг буйруғига таяниб, SPA агентлиги хабар бермоқда.
Эслатиб ўтамиз, Саудия Арабистонида 23 мартдан бошлаб шаҳарлар аҳолисининг ҳаракатланишига тақиқ киритилган бўлиб, кечки соат 19:00 дан эрталабки соат 06:00 га қадар комендантлик соати жорий этилган. Мазкур чеклов 21 кун давомида амалда бўлиши белгиланган эди.
«Саудия Арабистони подшоҳлигидаги барча минтақаларда 26 апрель кунидан 13 майга қадар комендантлик соати қисман бекор қилинади. Шу билан бирга, Макка ва изоляцияланган бошқа бир қатор туманларда бундан олдинги қарор ва баёнотларда кўрсатилган 24 соатлик комендантлик соати сақланиб қолинади», — дейилади буйруқда.
Бундан ташқари, юқорида кўрсатилган муддат ичида тижорий ва иқтисодий фаолият қайта тикланади. Буйруқга кўра, гап улгуржи ва чакана савдо дўконлари, шунингдек, савдо марказлари ҳақида кетмоқда. Қурилиш компаниялари ва заводлар ҳам ўз ишини қайта бошлаб олиши мумкин.
Аввалроқ Саудия Арабистонидаги ислом оламининг асосий зиёратгоҳлари — Маккадаги Ал-Ҳаром ва Мадинадаги Набавий Масжиди Рамазон ойида ҳам ёпиқ бўлиши маълум қилинганди.
Изоҳ (0)