«Асабийлашганидан шифокорнинг қўллари қалтирар эди». Ким Чен Инда ўтказилган жарроҳлик тафсилотлари маълум қилинди

Шимолий Корея етакчиси Ким Чен Инда юрак жарроҳлик амалиётини ўтказган шифокор уни ўз вақтида бажара олмади. Бу ҳақда Япониянинг Shukan Gendai журналига Хитойнинг тиббий доираларидаги манбаси хабар берган.

Унинг айтишича, КХДР раҳбарининг мамлакат бўйлаб навбатдаги сафарида у тўсатдан юрак ҳовучлаб қолиб, йиқилган. Тиббий ёрдам кўрсатиш мақсадида у яқин орадаги касалхонага олиб борилган. Шу билан бирга, Пекинга малакали шифокорлар гуруҳини юбориш сўрови жўнатилган. Улар Пекиндан КХДРга 23 апрель куни жўнаб кетган.

Ким Чен Иннинг аҳволи оғир бўлганидан, хитойлик шифокорлар келишини кутса кеч бўлишини ўйлаб, юрак қон томирларини стентлаш жарроҳлик амалиёти маҳаллий шифокорга ишониб топширилган. Қайд этилишича, бу мураккаб бўлмаган операция бўлиб, тахминан бир дақиқада тугатиш мумкин.

Манбанинг таъкидлашича, жарроҳ шу даражада асабийлашганидан қўллари том маънода қалтираган. Қолаверса унда тўладан келган мижозларни операция қилиш бўйича тажриба бўлмаган. Натижада 1 дақиқада битириш мумкин бўлган операцияни 7 дақиқада тугатган ва шу сабабли Ким Чен Ин «вегетатив ҳолатга тушиб қолган». Етиб келган хитойлик шифокорлар уни кўздан кечирган, лекин ҳеч нарса қила олмаган.

Аввалроқ CNN телеканали АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Президент Дональд Трамп эса Ким Чен Иннинг соғлиғи ёмонлашгани тўғрисидаги хабарларга жавоб берар экан, CNN’га унчалик ишонмаслигини билдирган.

25 апрель куни кечаси Хитойнинг Weibo ижтимоий тармоғида Гонконгнинг HKSTV телевидениеси директори ўринбосари номидан Ким Чен Иннинг ўлгани ҳақидаги хабар пайдо бўлган.

КХДР марказий газетаси Rodong Sinmun, шунингдек, мамлакат марказий радиосида эса Ким Чен Иннинг ўлими тўғрисидаги хабарлар фонида унинг номидан баёнот эълон қилинган. Унда Самчжиён шаҳрида сўнгги йилларда олиб борилаётган қурилиш ишларида меҳнат қилаётган ишчиларга миннатдорчилик билдирган. Бироқ баёнот қачон берилгани ва ҳозирда Ким Чен Ин қаерда эканлигига ойдинлик киритилмаган.

Маълумотларга кўра, Шимолий Кореяда 2019 йилдан буён ҳокимиятни топшириш учун фавқулодда режа тайёрланмоқда. Мамлакат тепасига амалдаги раҳбар Ким Чен Иннинг ўрнига унинг синглиси Ким Ё Чжон келиши мумкин.