Оқ уй АҚШ соғлиқни сақлаш ва ижтимоий хизматлар вазири Алекс Азарни коронавирусга қарши кураш масаласида қўйган хатолари учун лавозимидан озод этиши мумкин. Бу ҳақда Америка президенти аппаратидаги манбаларига таяниб, The Wall Street Journal хабар берди.
WSJ’нинг олти нафар суҳбатдошига кўра, сўнгги ҳафтада Оқ уй амалдорларининг Азар фаолиятидан ҳафсаласи пир бўлган. Шу билан бирга, президент администрацияси ходимлари идора раҳбарини пандемия вақтида ишдан олиб ташлашга ботина олмаяпти. Бироқ мамлакат раҳбари Дональд Трампнинг кутилмаганда кардларни алмаштириш ёки лавозимидан озод этишга мойиллиги бор.
Маълумотларга кўра, президент Азарнинг хатоларидан норози, чунки у коронавирус тарқалишининг дастлабки босқичида бу АҚШга жиддий зарар етказмаслигини маълум қилган.
АҚШ президенти матбуот котибининг ўринбосари Жадд Дирнинг сўзларига кўра, Оқ уй ушбу масалани муҳокама қилмаяпти.
«Вазир Азар раҳбарлигида Соғлиқни сақлаш вазирлиги президент томонидан қўйилган бир қатор муҳим вазифаларни бажаришда давом этмоқда… Ходимлар тўғрисидаги ҳар қандай миш-мишлар масъулиятсизлик бўлиб, ҳукуматни COVID-19’га қарши курашдан чалғитади», — дейди Дир.
Politico’нинг манбаларига кўра, Оқ уй Соғлиқни сақлаш вазирлигига раҳбар сифатида бир неча номзодни кўриб чиқмоқда. Хусусан, Азарнинг ўрнига унинг ўринбосари Эрик Харган келиши мумкин. Шунингдек, рўйхатдан Оқ уйнинг коронавирусга қарши кураш бўйича координатори Дебора Биркс ҳамда Medicare тиббий суғурда миллий дастури раҳбари Сима Верма ҳам ўрин олган.
Мавзуга доир:
Изоҳ (0)