Сурхондарё вилоятида уч нафар, Навоий вилоятида бир нафар бемор буткул соғайди. Сурхондарёда тузалганлардан бир нафари Қорақалпоғистондан, бир нафари Самарқанд ва яна бир нафари Наманган вилоятидан. Уларнинг барчаси (эркаклар) 27 март куни Москва—Термиз йўналишида чартер рейс билан келган ва карантинга олинган эди. Уларда коронавирус инфекцияси аниқлангач, вилоят юқумли касалликлар шифохонасига ётқизилган.
Навоийда тузалган бир нафар (эркак) бемор Тошкент шаҳридан бўлиб, коронавирус инфекциясига чалинганлар билан мулоқот орқали касалликни юқтириб олган. Ҳар икки вилоятдаги 4 нафар фуқаро орасида энг ёши каттаси 39 ёшда бўлса, энг ёши кичиги 19 ёшда, дея хабар бермоқда Соғлиқни сақлаш вазирлиги.
Бухоро вилоятида бир йўла 32 нафар бемор тўлиқ соғайди. Уларнинг 22 нафари вилоят кўп тармоқли марказидан, 10 нафари юқумли касалликлар шифохонасидан реабилитацияга кузатилди.
Шифо топганларнинг 30 нафари Россиядан, бир нафари эса Туркиядан чартер рейслар орқали Бухорога олиб келинган ва карантинга олинган эди. Уларда коронавирус инфекцияси тасдиқлангач, тиббиёт муассасаларига жойлаштирилган. Бир нафар бемор коронавирусга чалинганлар билан мулоқотда бўлиб, инфекцияни юқтириб олган.
Улардан 28 нафари эркак, тўрт нафари аёл. Беморларнинг олти нафари Андижон вилоятидан, беш нафари Тошкент вилоятидан, Қашқадарё, Бухоро ва Наманган вилоятларидан уч нафардан, Сурхондарё, Сирдарё, Самарқанд, Жиззах вилоятлари ва Тошкент шаҳридан икки нафардан, Қорақалпоғистон ва Хоразм вилоятидан эса бир нафардан. Улар орасида энг ёши каттаси 74 ёшда бўлса, энг ёши кичиги 15 ёшда.
Фарғона вилоят юқумли касалликлар шифохонасида ҳам коронавирус инфекциясига чалинган 22 нафар бемор бутунлай соғайди. Соғайганларнинг 19 нафари чартер рейс орқали Туркиядан, бир нафари Мисрдан ва яна бир нафари Прага шаҳридан Фарғонага келган бўлиб, карантинга олинган. Бир нафар фарғоналик бемор коронавирусга чалинганлар билан мулоқотда бўлиб, касалликни юқтирган.
Улардан тўққиз нафари Тошкент шаҳридан, беш нафари Қашқадарё вилоятидан, икки нафари Тошкент вилоятидан, шунингдек, Қорақалпоғистон Республикаси, Бухоро, Жиззах, Андижон, Фарғона ва Сирдарё вилоятларидан бир нафардан. Беморларнинг 10 нафари эркак, 12 нафари аёллар бўлиб, улар орасида энг ёши каттаси 49 ёшда бўлса, энг ёши кичиги 16 ёшда.
Қорақалпоғистон юқумли касалликлар шифохонасида 10 нафар коронавирус инфекциясига чалинган бемор соғайди. Соғайганларнинг бир нафари Фарғона вилоятидан, тўққиз нафари Қорақалпоғистондан (етти нафари Нукус шаҳридан бўлса, Қўнғирот ва Кегейли туманидан бир нафардан).
Уларнинг барчаси коронавирусга чалинганлар билан мулоқот орқали мазкур инфекцияни юқтириб олган эди. Беморларнинг уч нафари эркак, етти нафари аёл бўлиб, улар орасида энг ёши каттаси 42 ёшда бўлса, энг ёши кичиги 12 ёшда.
Тошкентдаги Эпидемиология, микробиология ва юқумли касалликлар илмий-текшириш институти клиникасида икки нафар, Хоразм вилояти юқумли касалликлар шифохонасида 16 нафар коронавирус инфекциясига чалинган бемор бутунлай соғайди.
Эпидемиология, микробиология ва юқумли касалликлар илмий-текшириш институти клиникасида соғайганлардан бир нафари (4 ёшли бола) Тошкент шаҳридан бўлиб, коронавирус инфекциясига чалинган беморлар билан мулоқот орқали касалликни юқтириб олган. Яна бир нафари (40 ёшли эркак) Бухоро вилоятидан бўлиб, Россиядан чартер рейсда келган.
Хоразм вилоятида соғайганларнинг 15 нафари 2020 йил 22 март куни Россиядан чартер рейс билан келган ва карантинга олинган. Коронавирус инфекцияси тасдиқлангач, вилоят юқумли касалликлар шифохонасига жойлаштирилган. Қолган бир нафари эса коронавирус инфекциясига чалинган беморлар билан мулоқот орқали касалликни юқтириб олган.
Улардан 15 нафари эркак, бир нафари аёлдир. Беморлар Қорақалпоғистон Республикаси ва Қашқадарё вилоятидан уч нафардан, Тошкент, Хоразм вилоятлари ва Тошкент шаҳридан икки нафардан, Наманган, Бухоро, Самарқанд ва Сурхондарё вилоятларидан бир нафардан. Улар орасида энг ёши каттаси 54 ёшда бўлса, энг ёши кичиги 22 ёшда.
Шундай қилиб, 25 апрель соат 15:50 ҳолатига кўра, Ўзбекистонда коронавирус инфекциясидан бутунлай соғайган беморлар сони 707 нафарни ташкил этмоқда. Маълумот учун, мамлакат бўйича жами аниқланган касалланиш ҳолатлари сони 1836 тани ташкил этмоқда, саккиз нафар бемор вафот этган.
Изоҳ (0)