Коронавирус сабабли Ўзбекистонда давлат бюджетида ташқи қарз бўйича ўрнатилган чегаравий миқдор қайта кўриб чиқилади

Ўзбекистон ҳукумати 2020 йилда давлат бюджетида ташқи қарзларнинг чегаравий миқдорини қайта кўриб чиқади. Бу ҳақда молия вазирининг ўринбосари Одилбек Исоқов маълум қилди, деб ёзмоқда «Gazeta.uz».

Макроиқтисодий барқарорликни таъминлаш мақсадида 2020 йилга мўлжалланган давлат бюджетида мамлакат номидан ёки ҳукумат кафолати остида ташқи қарзларни жалб қилиш бўйича янги имзоланган шартномалар учун энг юқори миқдор 4 миллиард долларни ташкил этади. Ушбу қарзни ўзлаштиришнинг максимал ҳажми йилига 1,5 миллиард долларни ташкил қилади.

Молия вазири ўринбосарининг сўзларига кўра, ўрта ва узоқ муддатли истиқболда давлат қарзини ЯИМнинг 50 фоизидан паст даражада ушлаб туриш учун 4 миллиард доллар миқдорида чеклов белгиланган.

«Биз давлат қарзи қай даражада бўлишини аниқлаш учун 2030 йилгача инфляция, ЯИМ ва валюта курси бўйича кутилмаларимизга асосланиб, прогноз ва моделлаштиришни ўтказдик. Ушбу прогнозлар асосида биз 4 миллиард доллар миқдорни белгилаган эдик», — деди Одилбек Исоқов.

Коронавирус пандемиясини ҳисобга олган ҳолда ҳукумат ташқи қарз олиш бўйича чекловларни қайта кўриб чиқишга мажбур. Бироқ бу «институционал нуқтаи назардан» давлат қарзини бошқариш бўйича Молия вазирлигининг консерватив ёндашувига таъсир қилмайди.

«Бу йил белгиланган энг юқори миқдор қайта кўриб чиқилади. Ҳозир у қанчага ўзгаришини айта олмайман. Ҳозир биз ушбу масала бўйича Инвестициялар ва ташқи савдо вазирлиги билан ишламоқдамиз. Улар давлат қарзи билан молиялаштириладиган қайси лойиҳаларни амалга ошириш муддати олдинга ёки орқага силжишини айтади. Бу нафақат иқтисодий муаммо, балки глобал таъминот занжири муаммосидир. Эҳтимол, баъзи лойиҳаларни амалга ошириш муддатлари ўзгартирилиши мумкин», — деди вазир ўринбосари.

Қарз олиш ва уни ўзлаштириш чегаралари 2021 йил бюджетида коронавирус пандемиясининг мамлакат иқтисодиётига таъсири таҳлилини ҳисобга олган ҳолда қайта кўриб чиқилади.

2020 йил 1 январь ҳолатига кўра, Ўзбекистоннинг ташқи давлат қарзи 15,6 миллиард долларни ёки ялпи ички маҳсулотнинг 27 фоизини ташкил этди. Бунда ҳукумат номидан олинган қарзлар 10,7 миллиард долларга, ҳукумат кафолати остида олинган қарзлар 4,9 миллиард долларга тенг бўлди.

Аввалроқ Ўзбекистон пандемия шароитида иқтисодиётни қўллаб-қувватлаш учун 1,6 миллиард доллар қарз олиш бўйича келишувларга эришгани ҳақида хабар берилган эди. Президентнинг 22 апрелда имзоланган қарорига кўра, Ўзбекистон пандемия оқибатларини юмшатиш учун 3,1 миллиард доллар жалб қилмоқчи.