АҚШда 5,1 миллиондан ортиқ одам COVID-19’га текширилди. Бу ҳақда мамлакат вице-президенти Майкл Пенсга таяниб, «РИА Новости» хабар берди.
«Маълумотларга кўра, 5,1 миллион америкалик коронавирусга тест топширган. Тестдан ўтказиш бутун мамлакат бўйлаб олиб борилаётгани учун касаллар сонида ҳам ошиш кузатилади. Одамлар бу каби рақамлардан тушкунликка тушмаслиги керак. Биз шифохоналарга, шунингдек, уларнинг қабул бўлимларига мурожаатлар борасида ижобий трендни кузатмоқдамиз», — дейди Пенс.
Вице-президентининг таъкидлашича, яқин ҳафталар ичида тестлар ўтказиш сезиларли даражада оширилади.
Жонс Ҳопкинс университети маълумотларига кўра, АҚШда коронавирус билан касалланганлар сони 889 минг кишидан, вирус қурбонлари сони эса 51 минг кишидан ошиб кетган. Бутун дунё бўйлаб эса COVID-19 оқибатида вафот этганлар сони 200 минг кишига яқинлашиб қолди.
Аввалроқ АҚШда коронавирусга қарши ўтказилаётган тестлар сони кескин қисқаргани ҳақида хабар берилганди.
Эслатиб ўтамиз, АҚШда коронавирусни даволаш бўйича 70 дан ортиқ усуллар синовдан ўтказилмоқда. Россияда эса COVID-19 ташхисини қўювчи 17 та тест давлат рўйхатидан ўтказилгани маълум қилинди.
Изоҳ (0)