АҚШда ўтган бир сутка ичида коронавирус билан касалланган 3,3 мингдан ортиқ бемор вафот этди. Бу ҳақда Жонс Ҳопкинс университети маълумотларида келтирилган.
Маълумотларга кўра, АҚШда ўтган бир сутка ичида 3332 киши COVID-19 қурбонига айланган. Ундан олдинги суткада ушбу кўрсаткич 2139 кишини ташкил этганди. Бутун АҚШ бўйлаб коронавирус оқибатида вафот этганлар сони 51 017 кишига етган.
Мамлакатда коронавирус билан касалланиш бўйича 890 524 та ҳолат қайд этилган, ўтган бир сутканинг ўзида 28 819 кишида вирус аниқланган.
Америкалик олимларнинг сўзларига кўра, коронавирусга чалинганлар сони расмий рақамлардан ўн баравар кўп бўлиши мумкин. Аввалроқ АҚШда коронавирусни даволаш бўйича 70 дан ортиқ усуллар синовдан ўтказилаётгани ҳақида хабар берилганди.
Эслатиб ўтамиз, АҚШ президенти Дональд Трамп коронавирус пандемияси сабаб юзага келган инқироз оқибатида ишсиз қолган америкаликларни ҳимоя қилиш мақсадида мамлакатга кирувчи иммигрантлар оқимини камида 60 кунга тўхтатиш ҳақидаги фармонни имзолади.
Изоҳ (0)