Xalq ta’limi vaziri Sherzod Shermatov “Doimiy propiska qilish hamda turgan joyi bo‘yicha hisobga olish tartibini isloh qilish chora-tadbirlari to‘g‘risida”gi Prezident farmoni imzolangunga qadar 6 mingdan ortiq pedagog xodimlar propiskadan o‘tolmay yillar davomida qiynalib kelganini ma’lum qildi. Bu haqda u o‘zining Telegram’dagi sahifasida yozib qoldirdi.
“To‘g‘risi, o‘zim Toshkentda tug‘ilib o‘sganim uchun propiska degan masalaga avval unchalik e’tibor qilmasdim. Lekin Xalq ta’limi vazirligiga o‘tganimda propiska bo‘yicha yuzlab murojaatlarni ko‘rdim, biroq rahbar sifatida ularga yordam bera olmaslikni boshdan o‘tkazdim va bu masala ushbu soha xodimlari uchun qanchalik zarur ekanini his qilishga to‘g‘ri kelgan paytlar bo‘lgan”, — deydi vazir o‘z bayonotida.
Uning ta’kidlashicha, maktablardagi oyliklar yillar davomida past bo‘lgani sababli toshkentliklar orasida maktabga ishga kirib ishlashni xohlovchilar ham unchalik ko‘p bo‘lmagan. Bunday sharoitda ishlash uchun esa ko‘pgina maktablar boshqa hududlardan kelgan xodimlarnigina ishga taklif qila olgan.
“Lekin, shu og‘ir mehnatiga qaramay, propiska degan rasmiyatchilikni deb, ular o‘z uyi bo‘lsa ham unga qonuniy egalik qila olmagan. Mana, Prezidentning ushbu farmoni bilan barcha davlat tashkilotlarida 5 yil ishlab kelgan xodimlar uchun propiska muammosi hal bo‘ldi. Shuning uchun bu farmondan son jihatdan eng ko‘p xursand bo‘lganlar, aynan xalq ta’limi sohasidagilar bo‘lsa kerak deb o‘ylayman”, — deya o‘z so‘zlarini yakunlagan Sherzod Shermatov.
Eslatib o‘tamiz, Shavkat Mirziyoyev Toshkent shahri va viloyatiga doimiy propiska qilishni soddalashtirish haqidagi farmonni 21-aprel kuni imzoladi. Farmonda Toshkent shahri va viloyatida joylashgan davlat organlari va tashkilotlarida 5 yil muddat mobaynida uzluksiz mehnat faoliyatini yuritayotgan mutaxassislarni (texnik, xizmat ko‘rsatuvchi va ishlab chiqarish xodimlaridan tashqari) mazkur hududlarda doimiy yashash joyi bo‘yicha ro‘yxatga olish belgilangan.
Izoh (0)