Шу кунларда ОАВда яқин икки кун ичида Қозоғистонда об-ҳавонинг кескин ўзгариши тўғрисида хабарлар тарқалди. Ўзбекистон Гидрометеорология хизмати бунинг Ўзбекистон об-ҳавосига таъсири бор-йўқлигига аниқлик киритди.
Қайд этилишича, 24—25 апрель кунлари Қозоғистоннинг ғарбий қисмлари Россиянинг Европа ҳудудларидан кирган жуда фаол атмосфера фронти таъсирида бўлади. Совуқ фронт ўтиши натижасида Қозоғистон Гидрометеорология хизмати мутахассислари мамлакатнинг ғарбий туманларида ёмғир ва қор кўринишидаги ёғингарчиликлар, 23-28 метр/секундгача кучли шамол ва ҳароратнинг совиб кетишини прогноз қилмоқда.
Қозоғистондан ўтаётган оқим жуда кучсиз кўринишда Ўзбекистоннинг фақат шимоли-ғарбий ҳудудларига таъсир қилади. 23 апрелда Қорақалпоғистон ҳудудига, 24 апрелда эса Қорақалпоғистон ва Хоразм вилоятининг айрим жойларига ёмғир ёғади, шамолнинг тезлиги секундига 15-20 метрга етади, ҳарорат кечаси 7-12, кундузи 17-22 даражагача пасаяди.
24 апрель кечга бориб Бухоро ва Навоий вилоятларида ёмғир ёғади, момақалдироқ бўлиши мумкин. Шамолнинг тезлиги кучайиб, секундига 15-20 метрга етади, 25 апрелда эса Тошкент, Самарқанд, Жиззах, Сирдарё вилоятларида ва Ўзбекистоннинг жанубий ҳудудларида ёмғир ёғади. 25 апрелда кундузги ҳарорат 20-25 даражагача пасаяди.
Бироқ, таъкидланишича, бу жараён Қозоғистондаги об-ҳавонинг кескин ўзгариши билан боғлиқ эмас, бу Туркманистон ҳудудидан кираётган нам ҳаво оқими натижасидир. Мутахассислар яқин кунларда об-ҳавонинг кескин ўзгариши кутилмаётганини маълум қилди.
Эслатиб ўтамиз, Ўзбекистон ҳудудига 7—9 апрель кунлари Волгабўйи тумани (Астрахан) орқали Россиянинг Европа ҳудуди (Москва вилояти) устида шаклланган нам ва совуқ ҳаво оқимлари кириб келганда, шамол тезлиги кучайиб, баъзи жойларда қор ёғганди.
Мавзуга доир: Баҳорнинг иккинчи ойида Тошкентда ёғган қор – суратларда
Изоҳ (0)