“O‘zgidromet” xabariga ko‘ra, O‘zbekiston hududining katta qismida 24-aprel, juma kuni, ob-havo quruq va iliq bo‘ldi. Kunduzi harorat 28-30, janubda esa 32-34 darajagacha isidi.
Faqat respublikaning shimoliy tumanlariga g‘arbiy Qozoqistondan kam nam va nisbatan salqin havo kirishi davom etadi. Qoraqalpog‘istonda va Xorazm viloyatida ayrim joylarga yomg‘ir yog‘adi, shamolning tezligi sekundiga 15-20 metrgacha kuchayishi mumkin. Harorat 17-20 darajagacha pasayadi.
Kechga yaqin respublikaning janubi—g‘arbiy tumanlariga Turkmanistondan nam havo oqim kirishni boshlaydi, 25-aprel, shanba kuni esa nam havo oqimi deyarli butun mamlakat hududiga tarqaladi. Barcha viloyatlarda havo bulutli bo‘ladi, 24-aprel kuni kechasi Buxoro, Navoiy viloyatlarida, shanba kuni kunduzi Toshkent, Samarqand, Jizzax, Sirdaryo viloyatlarida, respublika shimoli va janubida asosan kuchsiz yomg‘ir yog‘adi.
Momaqaldiroq bo‘lishi va shamolning tezligi 15-20 metr/sekundgacha kuchayishi mumkin. Kunduzgi harorat 22-25 darajagacha pasayadi.
Ta’kidlanishicha, har doim bahorda kuzatilganidek, ob-havoning bunday o‘zgarishi qisqa muddatli bo‘ladi, 26-aprel, yakshanba kuni havo yana ochiladi, yog‘ingarchiliksiz va kam bulutli bo‘ladi. Harorat tez ko‘tarilib, kunduzi 27-30 darajaga yetadi.
27-aprel, dushanba kuni ham respublika hududida ob-havo xuddi shunday kam bulutli va quruq bo‘ladi. Harorat ko‘tarilishi davom etadi, dushanba kuni havo harorati kunduzi 32-34 darajani, janubda 35-37 darajani tashkil qiladi.
“O‘zgidromet” eng issiq yillarda aprel oyida harorat 35-37, janubiy hududlarda esa 37-39 darajani tashkil qilganini eslatib o‘tgan.
Izoh (0)