Андижон вилоятининг Асака туманида уй олиб беришини айтиб, ҳамширанинг 13 минг долларини ўз эҳтиёжлари учун сарфлаб юборган фуқаро устидан жиноят иши қўзғатилди. Бу ҳақда «Дарё»га Асака туман ИИБ хабар бермоқда.
Жорий йилнинг 20 апрель куни Асака туман ИИБга тумандаги кўп тармоқли поликлиникада ишловчи ҳамшира Р.Р. мурожаат қилиб, уни алдаб кетишганини билдирган.
Аниқланишича, «Қурама» маҳалласида яшовчи 1982 йилда туғилган Л.Т. мазкур ҳудуддаги кўп тармоқли поликлиникада ишловчи, Фарғона вилояти Қува туманида яшовчи Р.Р.нинг ишончига кириб, унга Асака тумани ҳудудидан уй олиб беришни ваъда қилган. Эвазига 2018 йилнинг август ойида 8 минг доллар, 2019 йил июнь ойида эса 5 минг доллар пулини олган. Бироқ орадан шунча вақт ўтса-да, уй олиб бермаган. Пулни эса ўз эҳтиёжларига сарфлаб юборган.
Туман ИИБ томонидан тергов ҳаракатлари олиб борилганда фирибгарлик ҳолати аниқланган ва Л.Т. қўлга олинган.
Ҳолат юзасидан жорий йил 20 апрель куни Жиноят кодексининг 168-моддаси 2-қисми (Фирибгарлик) билан жиноят иши қўзғатилган. Дастлабки тергов ҳаракатлари олиб борилмоқда.
Изоҳ (0)