Нурмат Отабеков коронавирус юқиш хавфи кимларга ва қаерда кўпроқ эканлигини маълум қилди

Давлат бош санитария инспектори Нурмат Отабеков 23 апрель куни АОКА қошида ташкил этилган брифингда коронавирус кимларга, қаерда кўпроқ юқиш хавф юқори эканлигини маълум қилди. Бу ҳақда «Дарё» мухбири хабар бермоқда.

Унинг айтишича, касаллик юқтириш эҳтимоли биринчи ўринда дорихоналарда ишлайдиганларда юқори. «Асосий хавф шундаки, дорихонага ҳар хил тоифадаги соғлигида муаммо бор одамлар ташриф буюради», — дейди у.

Иккинчи ўринда — дўконлар. Шу сабабли дўконларга борганда хавфдан ҳимоялаш учун, албатта, ниқоб тақиш, арава тутқичига антисептик воситалар билан ишлов бериш, ўралган маҳсулотларни олиш, имкон қадар қадоқланган пакетларга камроқ қўл теккизиш зарур.

Учинчи ўринда — автомобилларга ёқилғи қуйиш шохобчалари. Ёқилғи қуядиган пистолетни кунига 10 дан ортиқ одам ушлайди.

Тўртинчи ўринда — итларни сайр қилдириш жойлари. Итларни олиб чиқишда одам тез-тез подъезд ва эшик тутқичларини ушлайди. Бундан ташқари, итлар вирусни оёқларида уйга ташиши мумкин.

Бешинчи ўринда — кўчага чиқинди ташлашга чиқиш. Нурмат Отабековнинг таъкидлашича, бунда хавф нисбатан пастроқ бўлса-да, айрим вақт чангда вирус заррачалари сақланиб қолган бўлиши мумкин.

Аввалроқ Давлат бош санитария инспектори фақат кескин чораларгина касаллик чўққисини енгиб ўтишга ёрдам беришини айтганди.