Қорақалпоғистон Республикасининг Нукус шаҳридаги Мотамсаро она ҳайкали жойлашган майдоннинг орқа томонида Жасорат боғи қурилмоқда. Бу ҳақда Шимоли-ғарбий ҳарбий округ матбуот хизмати «Дарё»га хабар берди.
Хабарга кўра мазкур боғ қурилиши учун Қорақалпоғистон Республикаси ҳарбий-маъмурий сектори томонидан 3 миллиард сўмга яқин пул маблағи ажратилган бўлиб, ишларни тезлаштириш мақсадида учта пудратчи ташкилот ёлланган.
Мавзуга доир: Нукусда ҳарбий техникаларни темир йўл орқали ташиш бўйича кўргазмали машғулот ўтказилди (фото)
Боғ барпо этиш ишларининг 80 фоизи тугатилган. Кўкаламзорлаштириш ва ёритиш тизимларини ўрнатиш каби ишлар якунига етса, объект фойдаланишга топширилади.
Жасорат боғи Мотамсаро она ҳайкали жойлашган майдоннинг орқа томонида, илгари ташландиқ ҳудуднинг деярли 100 сотих майдонида, бунёд этилмоқда.
Боғни жиҳозлаш учун Мудофаа вазирлиги музей фондидан экспонатлар ҳамда ҳарбий техникалар олиб келинган.
Шимоли-ғарбий ҳарбий округ қўшинлари қўмондонлиги томонидан боғда экспонат сифатида ўрнатиладиган ҳарбий техникаларни жойлаштириш, окоп, блиндаж ва ертўлаларни қазиш ишлари амалга оширилган.
Боғда жами 8 та техника: Т-64 танки, пиёдалар жанговар машиналари, зирҳли транспортёрлар ҳамда артиллерия ва зенит қурилмалари ўрнатилган. Боғ экспонатлари учун бир дона самолёт олиб келиниши кутилмоқда, дейилади хабарда.
Изоҳ (0)