23 апрель куни АОКА қошида ташкил этилган брифингда Санитария-эпидемиология назорати давлат инспекцияси бошлиғи Нурмат Отабеков коронавирус ҳақидаги турли саволларга жавоб берди. Бу ҳақда «Дарё» мухбири хабар бермоқда.
«Ҳозир барчани карантин қачон тугаши ҳақидаги савол қизиқтирмоқда. Аксарият мутахассислар ёз келиши билан коронавирус тарқалиши камая боради, деб ҳисобламоқда. Айрим олимлар эса инфекция билан аҳолининг тахминан 70 фоизи касалланади, натижада иммунитет пайдо бўлиб, пандемия сезиларли кескинлашади ёки бутунлай тугайди, деган фикрда», — деди у.
Шунингдек, Нурмат Отабеков фақат кескин чораларгина касаллик чўққисини енгиб ўтишга ёрдам беради, шунинг учун ўз-ўзини изоляция қилиш режимига риоя этиш лозимлигини таъкидлади.
Эслатиб ўтамиз, Республика махсус комиссияси томонидан 20 апрелга қадар жорий этилган чекловчи тадбирлар (карантин) ҳамда коронавирус инфекцияси тарқалишига қарши кучайтирилган тартиб 10 майга қадар узайтирилди. Бош вазир ўринбосари Жамшид Қўчқоров Ўзбекистонда карантин билан боғлиқ чеклов чоралари май ойида ҳам давом этиши эҳтимоли анча катталигини айтганди. Карантиннинг қачон тугаши эса номаълум. У Республика махсус комиссияси қарорига кўра амалга оширилади.
Изоҳ (0)