Ijtimoiy tarmoqlarda Andijon viloyatida biolog va shifokorlardan iborat bir guruh yoshlar koronavirusga qarshi dori o‘ylab topgani haqida xabarlar tarqaldi. Sanitariya-epidemiologiya nazorati davlat inspeksiyasi boshlig‘i Nurmat Otabekov ushbu xabarlarga munosabat bildirdi.
Uning aytishicha, koronavirus infeksiyasini davolash bo‘yicha dori vositalari bugungi kunda ko‘plab nufuzli ilmiy muassasalar olimlari tomonidan o‘rganilmoqda. Hozirgi paytda tibbiyot amaliyotida kasallik qo‘zg‘atuvchisiga qarshi aynan qaysi dorini qo‘llash samara berishi haqida rasmiy ma’lumotlar mavjud emas.
“Koronavirusning (COVID-19) shtammi bilan chaqirilgan kasallikni davolashda dunyo hamjamiyatida nimaiki ilg‘or usul bo‘lsa, u O‘zbekiston amaliyotida qo‘llanilmoqda. Natijalarga e’tibor beraylik, O‘zbekistonda shu paytgacha qayd etilgan bemorlarning 26,2 foizi sog‘ayib reabilitatsiya markazlariga o‘tkazildi. Dunyoda bu ko‘rsatkich 24,3 foizni tashkil qilyapdi. Ularning 56,671 (3,4 foizi) og‘ir ahvolda qolmoqda”, — deb Nurmat Otabekovning AOKA huzurida tashkil etilgan shtabda aytgan so‘zlarini keltirmoqda “Daryo” muxbiri.
Davlat bosh sanitariya inspektorining ta’kidlashicha, O‘zbekistonda ushbu kasallikga qarshi dori ishlab chiqish borasida har qanday harakatlar va intilishlarni 100 foiz qo‘llab-quvvatlaydi, bu kabi tashabbuslarning tarafdori. Biroq dori ishlab chiqish bu o‘ta qiyin va ko‘p xarajatli jarayon.
“Bitta narsani aniq bilib olishimiz kerak bo‘ladi, kasallikning klinik belgilari namoyon bo‘lishini kamaytirgan, yo‘qotgan, yumshatgan narsaning hammasi ham dori bo‘lavermaydi. Dori kasallik qo‘zg‘atuvchisiga (virus, zamburug‘, mikroorganizmlar va boshqalar) ta’sir qilib uni o‘ldirishi kerak. Buning uchun virus, zamburug‘ yoki mikrobni toza holda ajratib olib, yaratilgan dori vositasining unga bevosita ta’sirini, qaysi mexanizmlar ishga tushishi orqali u nobud bo‘lishini kuzatish va isbotlash kerak.
Bir narsani aniq aytib qo‘yay, eng zamonaviy asbob-anjomlari, apparaturalari bor bo‘lgan juda ko‘p davlatlar, shu jumladan, O‘zbekiston ham hali bu virusni toza holda ajratib olmagan. Laboratoriya tekshiruvlarida esa virus antigeni borligi aniqlanib, kasallik tasdiqlanadi”, — degan u.
Avvalroq Nurmat Otabekov koronavirus yuqish xavfi kimlarga va qayerda ko‘proq ekanligini aytib, faqat keskin choralargina kasallik cho‘qqisini yengib o‘tishga yordam berishini ta’kidlagandi.
Izoh (0)