Бош прокуратура матбуот котиби Ҳаёт Шамсутдинов Тошкент вилоятида 18 ёшли қизнинг танишлари томонидан пичоқлангани ва Туябўғиз каналига ташлаб юборилгани ҳақида «Дарё»га хабар берди.
Унга кўра 2020 йил 20 апрель куни соат 03:00 ларда Зангиота тумани, «Қуёшли» маҳалласида 2003 йилда туғилган А.Қ. икки нафар шериги билан уларга олдиндан таниш бўлган қиз 2002 йилда туғилган К.Р. билан ўзаро жанжаллашиб, ошхона пичоғи билан унинг бўйин, қорин ҳамда танасининг турли қисмларига уриб, шу ердан оқиб ўтувчи Туябўғиз каналига ташлаб юборган ва шериклари билан ҳодиса жойидан яширинган.
К.Р. олган тан жароҳатларига қарамасдан каналдан чиқиб, ўз уйига етиб борган ва яқинлари томонидан туман тиббиёт бирлашмасининг жонлантириш бўлимига ётқизилган. Унинг ҳаёти шифокорлар томонидан сақлаб қолинган.
А.К ва унинг шериклари қўлган олинган. Мазкур ҳолат юзасидан 20 апрель куни А.К. ва бошқаларга нисбатан Жиноят кодексининг 25-моддаси (Жиноятга тайёргарлик кўриш ва жиноят содир этишга суиқасд қилиш) 97-модда 2-қисми «п» банди (Бир гуруҳ шахслар ёки уюшган гуруҳ аъзоси томонидан ёхуд ўша гуруҳ манфаатларини кўзлаган ҳолда қасддан одам ўлдириш) билан жиноят иши қўзғатилган.
