Шавкат Мирзиёев Тошкент шаҳри ва вилоятига доимий прописка қилишни соддалаштириш ҳақидаги фармонни имзолади

Шавкат Мирзиёев 21 апрель, сешанба куни, Тошкент шаҳри ва Тошкент вилоятига доимий прописка қилиш тизимини такомиллаштириш тўғрисидаги ҳужжатни имзолади. Бу ҳақда «Kun.uz» хабар берган.

Хабарга кўра, Президент фармонига мувофиқ бундан буён ишдан бўшатилган ва Тошкент шаҳрида доимий рўйхатга қўйилиш юзасидан махсус рўйхат асосида пропискага қўйилган ходимнинг пропискаси «куйиб кетмайди», пойтахтдан уй сотиб олиш учун прописка талаб қилинмайди, бошқа вилоятда яшовчи шахслардан Тошкент шаҳридан уй олганда ундириладиган оширилган қийматдаги давлат божи ҳам бекор қилинади.

Ҳужжатга кўра, «прописка» тушунчаси бекор бўлиб, ўрнига «рўйхатдан ўтказиш» тушунчаси киритилмоқда. Ички ишлар вазири ўринбосари Азиз Икромов февраль ойида шундай ўзгариш бўлиши ҳақида гапирганди.

Илгари фуқаро давлат органидаги фаолияти даврида пропискага кирган, ишдан бўшатилганда ёки шартномада белгиланган муддати якунига етганда пропискадан чиқариб юборилган бўлса, энди бундай бўлмайди. Унинг пропискаси сақлаб қолинади.

Бундан ташқари фармон билан эр-хотиннинг никоҳдан кейин бир йил давомида бирга яшаши талаб этилган ва бир йил ичида никоҳ бекор қилинганда прописканинг йўқолиши ҳақидаги талаб ҳам бекор қилинмоқда.

Муқаддам Тошкент шаҳри ва вилоятида доимий рўйхатда турган фуқаролар маълум муддат бошқа ҳудудда яшаб, ўзлари яшаган жойга қайтиб келганда улар ҳеч қандай қўшимча шартларсиз қайта доимий рўйхатга олинади.

Шунингдек, фармонда оилага тарбияга олинган (патронат) шахслар уларнинг тутинган ота-онасининг доимий яшаш жойи бўйича рўйхатда туриш имкониятига эга бўлиши белгиланмоқда.

Тошкент шаҳри ва вилоятида доимий ва вақтинча рўйхатдан ўтмасдан яшаш муддати узайтирилади. Бу муддат 10 кунни ташкил этган бўлса, энди 15 кунга ўзгартирилмоқда, дейилади хабарда.

«Асосий ишчи кучи яшайдиган ва иш ўринлари яратилаётган ҳудудларимиз ўртасида тафовут мавжуд. Бунинг ечими — ички миграцияни эркинлаштиришдир. Шу боис парламент ва ҳукумат 2020 йил 1 апрелга қадар прописка тизимини ислоҳ қилиш бўйича халқаро тажрибани ўрганиб, аниқ таклифларни ишлаб чиқиши лозим», — деган эди Президент.