Давлат солиқ қўмитаси карантин даврида корхоналар ишини енгиллаштириш ва узлуксиз фаолият юритиши учун мақбул шароитлар яратиш мақсадида йирик солиқ тўловчиларнинг транспорт воситаларига махсус рухсатнома (стикер) беришни бошлайди. Бу ҳақда ДСҚ матбуот хизмати хабар берган.
Хабарга кўра, стикерлар йирик солиқ тўловчилар тоифасига кирувчи корхоналар ходимларининг шахсий ёки хизмат автотранспорт воситалари учун берилади.
Рухсат берувчи ҳужжатни олиш учун фақат онлайн тарзда электрон солиқ хизматлари портали («my.soliq.uz»)да солиқ тўловчининг шахсий кабинети орқали махсус анкетани тўлдириб, ариза бериш мумкин.
Автотранспортда ҳаракатланиш учун керак бўладиган махсус QR-кодли рухсатномани принтер орқали чоп этиш лозим. У ариза юборилган кундан бошлаб бир иш куни ичида шакллантирилади. Рухсат бериш учун ҳеч қандай тўлов олинмайди.
Давлат солиқ қўмитаси томонидан ҳар бир солиқ тўловчига алоҳида стикер квоталари белгиланади. Махсус рухсатнома у олинган кундан бошлаб 30 кун мобайнида ҳаракатланиш ҳуқуқини беради.
Автотранспорт воситасидан фойдаланиш учун рухсат берувчи стикер олган ходимлар меҳнат дафтарчасининг нусхаси ва иш жойидан берилган тасдиқловчи ҳужжатга эга бўлиши керак. Ходимларга фақат белгиланган йўналиш бўйича хизмат мақсадларида соат 9:00 дан 18:00 гача транспорт воситасидан фойдаланишга рухсат берилади, дейилган ДСҚ хабарида.
Мавзуга доир:
- Давлат солиқ қўмитаси: «Ўттиз мингдан ортиқ чакана савдо тармоқларидан нархни оширмаслик ҳақида Кафолат хати олинган»
- Давлат солиқ қўмитаси: «Солиқ тушумларининг камайиб кетиши карантин қоидаларини юмшатилишига сабаб бўла олмайди»
- Шоҳрух Ғиёсов: «Махсус стикери бор автомобиль эгаларининг барча ҳужжатлари тўлиқ бўлиши керак»
Изоҳ (0)